Astana sot alqasy Eńbek jáne halyqty áleýmettik qorǵaý ministrliginiń burynǵy vitse-ministri Nurjan Áltaevtyń apelliatsiialyq shaǵymyn qanaǵattandyrmady. Burynǵy joǵary laýazymdy sheneýnik 10 jyl koloniiada otyrady.
Nurjan Áltaev apelliatsiialyq shaǵymynda (El Teregi Facebook-paraqshasynda jariialanǵan - esk.) "Atameken" UKP burynǵy basshysy Abylai Myrzahmetovten para alǵany úshin kináli dep tanyǵan birinshi satydaǵy sot úkimimen kelispeitinin aitty.
"Myrzahmetov te, Ámirov te bul qarajatty alǵanymdy kórmedi jáne ony rastai almady", - dep jazylǵan shaǵymda.
Áltaev Myrzahmetov onyń ústinen aryz jazǵan kezde bir ai boiy tergeý izoliatorynda qamaýda bolǵanyn aitty.
Aita keteiik, 2023 jylǵy 21 qarashada sot Nurjan Áltaevty QR Qylmystyq kodeksiniń 366-baby, 4-bóligi "Asa iri mólsherde para alý" boiynsha kináli dep taýyp, 10 jylǵa bas bostandyǵynan aiyrǵan edi.
"Nurjan Áltaev 2018-2020 jyldary eńbek jáne halyqty áleýmettik qorǵaý vitse-ministri retinde "Atameken" Ulttyq kásipkerler palatasynyń burynǵy tóraǵasy Abylai Myrzahmetovten deldal arqyly para alǵany úshin kináli dep tanyldy. Paranyń jalpy somasy 50 million teńgeden asady (115 myń dollar jáne 8 million teńge). Osy aqshaǵa Áltaev "Atameken" UKP múddesin qoldady. Sondai-aq, úkimde Áltaev Májilis depýtaty bola tura Parlamentte "Atameken" UKP múddesin qoldaǵany úshin Myrzahmetovten aiyna 5000 dollardan para alyp turǵany kórsetilgen", - dep jazylǵan bes.media málimetinde.
Nurjan Áltaev 1978 jyly Ońtústik Qazaqstan oblysynda dúniege kelgen. Ol "Atameken" UKP Basqarma tóraǵasynyń orynbasary; aýyl sharýashylyǵy vitse-ministri; eńbek jáne halyqty áleýmettik qorǵaý vitse-ministri; Májilis depýtaty boldy.
