Belgili zańger Erjan Esimhanov Sherzat Bolattyń ákesi Qarjaýbai Nurymovtyń qamaýǵa alynýyna qatysty oiyn aitty, - dep habarlaidy Dalanews.kz.
Zańger bul jańalyqty taldai kele ony eki qyrdan qarastyrý keregin atap ótti. Biri - politsiianyń kózqarasy, ekinshisin – qoǵam. Biraq ekeýi de óte mańyzdy.
"Birinshisi – resmi, zańdyq qyry. Eger adam agressivti áreket jasap, ainalasyndaǵylarǵa qaýip tóndirse, ol qamaýǵa alynýy múmkin. Sherzattyń ákesi "usaq buzaqylyq" baby boiynsha jaýapqa tartyldy. Bul bap boiynsha, eger adam alǵash ret quqyq buzýshylyq jasasa, oǵan aiyppul salý nemese on bes táýlikke deiin qamaýǵa alý sharalary qoldanylýy múmkin. Sot aiyppul salyp nemese qamaý merzimin qysqartýǵa múmkindigi boldy. Biraq sot bul múmkindikti paidalanbady", - deidi zańger.
Bul – resmi, zań turǵysyndaǵy kózqaras. Osy negizde politsiia men sot quqyq buzýshyny jaýapqa tartty. Zańǵa sáikes bári durys siiaqty kórinedi.
"Biraq máseleniń taǵy bir qyry bar – ol qoǵamnyń kózqarasy. Eki aidyń ishinde Nurymov uly men inisinen aiyryldy. Úii órtenip ketti. Oǵan qoqan-loqqy jasaldy. Sońynda ol uzaq ýaqyt boiy Talǵar politsiiasy men ákimdiginiń nazaryn aýdartýǵa tyrysty. Onyń isi tek qoǵamda úlken rezonans týdyrǵannan keiin ǵana qaraldy. Aitpaqshy, osy iske bailanysty kóptegen politsei men ákimdik qyzmetkeri jumystan bosatyldy.
Osynyń bárin bastan ótkergen adamdy on bes táýlikke qamaý, qarapaiym adami kózqaraspen alǵanda, tym qatal sheshim siiaqty kórinedi. Sol ákimshilik kodekste-aq jaýapkershilikti jeńildetetin jaǵdailar bar, mysaly, aýyr jeke nemese otbasylyq jaǵdailar. Joǵaryda atalǵannyń bári – óte aýyr otbasylyq jaǵdai ekeni anyq. Qajet bolsa, bul adamdy, qylmysker de, buzaqy da emes, qaiǵydan qan jutqan ákeni qatal jazalamai, zańdy jolyn tabýǵa bolatyn edi. Biraq qazaqstandyq politsiia men sot ádette resmi jaqty tańdaidy. Ózderi úshin yńǵaily tusy sol. Sol sebepti qoǵam olardy sirek túsinedi, ári qoldai bermeidi", - deidi zańger.
Eske salaiyq, Sherzat Bolattyń ákesine qatysty tergeý júrgizile bastady. Bul týraly olardyń advokaty Asqar Qaimaqov habarlady. Onyń málimetinshe, politsiia Qarjaýbai Nurymovqa qatysty Qylmystyq kodekstiń 202-baby ("Bótenniń múlkin qasaqana joiý nemese búldirý") boiynsha sotqa deiingi tergeý júrgizýdi bastaǵan.
Odan bólek, advokat Talǵar isi boiynsha birneshe málimdeme jasady:
- Advokattar politsiia aitqandai tártip saqshylarynan Qarjaýbaidy ustaýdy suramaǵan;
- Marqum Nurqanattyń týystary onyń jeke hat-habaryn jariialaýǵa kelisim bermegen eken.
Asqar Qaimaqov Qarjaýbai Nurymovty 15 táýlikke qamaý týraly sot sheshimin zańsyz dep sanaitynyn atap ótti. Onyń pikirinshe, sot tarapynan óreskel zańbuzýshylyqtar bolǵan. Olar apelliatsiialyq tártippen shaǵymdanǵan.
