Májilis depýtaty Ermurat Bapi eks-ministr Qýandyq Bishimbaevtyń isine qatysty pikir bildirdi, - dep habarlaidy Dalanews.kz.
Májiliste jýrnalisterdiń suraqtaryna jaýap bergen depýtat sot ádil ótetinine senimdi.
"Bishimbaevtyń isin baqylap otyrǵan adam emespin. Bul - turmystyq dárejedegi oqiǵa. Árine, adam óldi. Buǵan alańdaýshylyq bar. Sol turǵyda zańdy kúsheitý jóninde talaptar bolyp jatyr. Árine, bul turǵyda is qozǵaldy, is sotqa berildi, sot bastaldy.
Búkil qoǵam alańdap qarap otyrǵan kezde sot bura tartyp ketedi dep oilamaimyn. Sotty júrgizip otyrǵan sýdianyń da eki basy joq, prokýrordyń da eki basy joq. Sondyqtan sot ádil sheshim shyǵarady degen oidamyn", - deidi depýtat.
Aita keteiik, birinshi aldyn ala tyńdaýda eks-sheneýnik Bishimbaev Astana sotynan alqa biler, BAQ ókilderiniń qatysýymen ashyq sot ótkizýdi surady.
"Men aiyptaýdyń mánin jan-jaqty túsindim. Alaida taǵylǵan aiypty moiyndamaimyn", – dedi kúdikti sot zalynda.
Al zańger Tileýjan Kishkenebaevtyń sózinshe, bul - jazany jeńildetý úshin jasalyp jatqan áreket.
"Ol "qasaqana istegen joqpyn" degen ýáj keltirip otyr. Iaǵni ol óziniń jazasyn jeńildetýdiń áreketine kóshti. "Óltiretin nietim bolǵan joq, ekeýmiz janjaldasqanymyzdyń saldarynan" degen sekildi keltirgisi kelip jatyr.
Tergeýde saraptamalar jasalady. Ol jerde nemen urǵany, qai jerine urǵany, adam neden qaitys bolǵany saraptama qorytyndysymen rastalady, bári zertteledi. Saraptama qorytyndysyna súiene otyryp, aiyp taǵady. Qazir adam óltirý deregi boiynsha taǵylǵan aiypty ol "adam óltiretin nietim bolǵan joq, abaisyzda" degenge keltirgisi kelip otyr. Óziniń basynyń amandyǵy úshin jazany jeńildetý áreketi. Kez kelgen sottalýshynyń isteitin áreketi ǵoi.
15 jyldan beri osyndai qylmystardy qarap kele jatyrmyz. Kóp sottalýshy "abaisyzda jasadyq" degen sekildi aitady. Al shyndyǵynda ol qandai zatpen ursa, qai jerinen ursa, jandy jerinen ursa, adam óletinin bildi", - deidi ol.
Eske salaiyq, byltyr Qýandyq Bishimbaev áieli Saltanat Núkenovany óltirdi degen kúdikpen qamaýǵa alynǵan edi. Oqiǵa 2023 jyly 9 qarashada Astana qalasyndaǵy BAU meiramhanasynda boldy.
