Sot "Ahýal Segodnia" YouTube arnasynyń avtory Azamat Omarovqa qatysty bultartpaý sharasyn jeńildetýden bas tartty, dep habarlaidy dalanews.kz.
"Za nami ýje vyehali" telegram arnasynyń málimetinshe, advokattary ony qamaýdan bosatyp, bultartpaý sharasyn jeńildetýdi suraǵan. Alaida sot bul ótinishti qanaǵattandyrmady. Bul týraly Omarovtyń jubaiy Venera Mýstafina málimdedi.
Onyń aitýynsha, ózi tergeý izoliatoryna baryp, Azamat Omarovpen kezdesken. Qazirgi ýaqytta ol bes adamǵa arnalǵan kamerada otyr, onda ózimen birge taǵy úsh adam qamaýda.
Eske salaiyq, Azamat Omarov 18 shilde kúni óz úiinde ustalǵan bolatyn. Tintý kezinde kompiýterleri, qatqyl diskileri men uialy telefondary tárkilengen. Keiin Astana soty ony ultaralyq arazdyqty qozdyrdy degen kúdikke bailanysty eki aiǵa qamaýǵa sanktsiia bergen.
