Biyl birtýar qalamger, qazaq jáne balalar ádebietiniń uly klassigi, qara sózdiń qambasy jazýshy Berdibek Soqpaqbaevtyń týǵanyna - 100 jyl tolyp otyr. Balalar ádebietiniń ozyq ókiliniń mereitoiy jer jerde atalyp ótýde. Eń basty toi qalamgerdiń mereitoiy IýNESKO kóleminde atalyp ótedi, dep habarlaidy Dalanews.kz.
Bul týraly mádeniet jáne aqparat ministrligi málimdegen bolatyn.
"Memleket basshysy Qasym-Jomart Toqaevtyń bastamasymen qalamgerdiń 100 jyldyǵy toilana bastady. Berdibek Soqpaqbaevtyń týǵan aýyly Narynqolda eńseli eskertkishi boi kóteredi. Sondai-aq jazýshynyń esimi birqatar saiabaqqa, bilim oshaǵy men oblystyq kitaphanaǵa beriledi", — dep jazylǵan habarlamada.
Berdibek Soqpaqbaevtyń artynda balalar men jasóspirimderge arnalǵan jiyrmadan artyq áńgime jáne povest, roman qaldy. Aitalyq, "Meniń atym — Qoja" men "Balalyq shaqqa saiahat" jáne "Ólgender qaityp kelmeidi" qatarly shyǵarmalary qazaq ádebietiniń altyn qazynasyna engen jaýharlar.
Jazýshynyń mereitoiy ózi týǵan topyraqta bastalyp, Almaty oblysynyń ortalyǵy Qonaev qalasynda qalamgerdiń júz jyldyǵyna arnalǵan mádeni sharanyń shymyldyǵy túrildi.
Berdibek Soqpaqbaev esimi eńbektegen baladan, eńkeigen kárige deiin tanys. Olai bolatyn sebebi «Meniń atym – Qoja» filmin kórgen kórermenderdiń aldy alpysty alqymdaǵan aqsaqal. Bul film kúni búginge deiin óz kórermenderin joǵaltpaǵan, qazaq kino óneriniń altyn arqaýy.
Ákesiniń mereitoiy týraly tolǵanysyn jasyra almaǵan Samal Soqpaqbaeva "Biyl ákemniń mereitoiy. Ákemdi jáne Soqpaqbaev eńbekterin eske alyp, baǵalap, úlken mereke, is shara ótkizý – eń bastysy, bizdiń ósip kele jatqan urpaqtarymyz ben balalarymyz úshin mańyzdy dep oilaimyn. Meniń ákem qanshama shyǵarmalar jazdy, qanshama qyzyqty áńgimeleri bar, kitaptary bar. Týyndylarynyń bári ákemniń óz ómirinen alynǵan. Qalamger birde bir áńgimesin oiynan shyǵaryp jazǵan joq. Ol oqý bilimge, kitapqa qatty qushtar boldy" - dep, aǵynan jaryldy.
Soqpaqbaev shyǵarmashylyǵynyń eń basty ereksheligi – ol ózi ómir súrgen ýaqytty jazdy, zamannyń shynaiy bet beinesin, kelbetin sýrettedi. Ádebiet synshylary da onyń eshqashan ótirik jazbaǵanyn, bura tartpaǵanyn, shyǵarmashylyǵy tek qana shyndyqqa qurylǵanyn, sonysymen, balalardyń súiikti qalamgeri bolǵanyn aitady. Bala ótirik jazǵandy, ásire sýretteýdi jaqsy kórmeidi. Jazýshy ómiriniń sońǵy 28 jylynda qolyna qalam almai ketken, sebebi ótirik jazǵysy kelmegen.
Bul týraly qalamgerdiń qyzy Samal Berdibekqyzy "Ákem maǵan "Men ótirik jaza almaimyn. Maǵan ótirik jaz deidi. Men olai jaza almaimyn. Sondyqtan jazýdy qoiyp kettim", deitin" - dedi bir sózinde.
Jazýshy toiy biyl IýNESKO kóleminde atalyp ótedi. Onyń ózindik sebebi de bar. Bul qalamger qýatynyń aiqyn kórinisi. Bul týraly aqyn, májilis depýtaty Janarbek Áshimjan bylai deidi: "Halyqaralyq deńgeide Túrki memleketterinde ǵana emes, alys-jaqyn shetelderde Berdibek Soqpaqbaevtyń shyǵarmashylyǵymen tanys aýditoriia bar. Sheteldiń ádebi synshylary bar. Sol halyqaralyq deńgeide de bizdiń ádebiet úshin ult rýhaniiaty úshin úlken bir oqiǵa. Áli de bizdiń qoǵamdyq ómirimizge qatysty dúnielerdi Soqpaqbaevtyń shyǵarmalarynan tabýǵa bolady".
Al Qazaqstarn jazýshylar odaǵynyń basqarma tóraǵasy Mereke Qulkenov bolsa, "Meniń atym - Qoja" erekshe bala, Selendjerdiń kitaby siiaqty kitap degen oi aitty. Biyl Qazaqstan Prezidenti Q.Toqaevtyń bastamasymen ádebiet báitereginiń ǵasyr toiy – júz jyldyǵy jyl basynan beri joǵary deńgeide toilana bastady. Jospar boiynsha, qalamgerdiń kindik qany tamǵan Narynqolda Soqpaqbaev esimi beriletin saiabaqta eńseli eskertkish boi kóteretin bolady. Sonymen birge, qalamgerdiń atymen atalatyn bilim oshaqtary, oblystyq kitaphana, birqatar saiabaq boi kóteredi.
