Qorǵanys ministri Dáýren Qosanov Áýe qorǵanysy kúshteriniń joǵalǵan EC-145 tikushaǵyn izdeý jumystarymen tanysty, dep habarlaidy Dalanews.kz.
Áskeri-áýe kúshteriniń qolbasshysy, aviatsiia general-maiory Asqar Izbasov Sorbulaq kólindegi izdeý jumystary barysynan habardar etti.
"Izdeý jumystaryna sý asty relefi men túbiniń shógindi, sý lai bolýy kedergi keltirip otyr. Alaida 25 shildede joǵalyp ketken Áýe qorǵanys kúshteri EC-145 tikushaǵynyń bortynda bolǵandardyń qai jerde ekenin anyqtaý boiynsha aýqymdy izdeý qutqarý operatsiiasy kúndiz de, túnde de toqtamaidy", - dedi áskeri-áýe kúshteriniń qolbasshysy.
Dáýren Qosanov joǵalǵan ushqyshtardyń týystarymen kezdesti. Ministr olarǵa qoldaý bildirip, operatsiia táýlik boiy jalǵasatynyn, barlyq resýrs jumyldyrylǵanyn jáne áskeriler joldastaryn tabý úshin qoldan kelgenniń bárin jasaitynyn aitty.
"Biz sońyna deiin áreket etip, izdeýdi jalǵastyramyz. Jaqyn týystaryna jan-jaqty qoldaý kórsetiledi, kún saiyn bailanystamyz. Qaiǵyly jaǵdaidyń sebepterin anyqtaý jáne joǵalǵandardy tabý úshin bar kúshimizdi salamyz", – dedi qorǵanys ministri.
Qorǵanys ministrligi málimetinshe, joǵalǵandardyń týystary izdeý tobynyń quramynda Sorbulaq kólin ainalyp ótip, áýeden sý túbin kórý múmkin emestigine kóz jetkizgen.
Izdestirý operatsiiasyna 400-den asa adam, kinologiialyq toptar, 70-ten asa jerústi tehnikasy, 21 júzý quraly, 10 UUA, eholottar, sýasty skanerleý quraldary jumyldyrylǵan.
