قورعانىس ءمينيسترى داۋرەن قوسانوۆ اۋە قورعانىسى كۇشتەرىنىڭ جوعالعان EC-145 تىكۇشاعىن ىزدەۋ جۇمىستارىمەن تانىستى، دەپ حابارلايدى Dalanews.kz.

اسكەري-اۋە كۇشتەرىنىڭ قولباسشىسى، اۆياسيا گەنەرال-مايورى اسقار ءىزباسوۆ سوربۇلاق كولىندەگى ىزدەۋ جۇمىستارى بارىسىنان حاباردار ەتتى.

"ىزدەۋ جۇمىستارىنا سۋ استى رەلەفى مەن ءتۇبىنىڭ شوگىندى، سۋ لاي بولۋى كەدەرگى كەلتىرىپ وتىر. الايدا 25 شىلدەدە جوعالىپ كەتكەن اۋە قورعانىس كۇشتەرى EC-145 تىكۇشاعىنىڭ بورتىندا بولعانداردىڭ قاي جەردە ەكەنىن انىقتاۋ بويىنشا اۋقىمدى ىزدەۋ قۇتقارۋ وپەراسياسى كۇندىز دە، تۇندە دە توقتامايدى"، - دەدى اسكەري-اۋە كۇشتەرىنىڭ قولباسشىسى.

داۋرەن قوسانوۆ جوعالعان ۇشقىشتاردىڭ تۋىستارىمەن كەزدەستى. مينيستر ولارعا قولداۋ ءبىلدىرىپ، وپەراسيا تاۋلىك بويى جالعاساتىنىن، بارلىق رەسۋرس جۇمىلدىرىلعانىن جانە اسكەريلەر جولداستارىن تابۋ ءۇشىن قولدان كەلگەننىڭ ءبارىن جاسايتىنىن ايتتى.

"ءبىز سوڭىنا دەيىن ارەكەت ەتىپ، ىزدەۋدى جالعاستىرامىز. جاقىن تۋىستارىنا جان-جاقتى قولداۋ كورسەتىلەدى، كۇن سايىن بايلانىستامىز. قايعىلى جاعدايدىڭ سەبەپتەرىن انىقتاۋ جانە جوعالعانداردى تابۋ ءۇشىن بار كۇشىمىزدى سالامىز"، – دەدى قورعانىس ءمينيسترى.

قورعانىس مينيسترلىگى مالىمەتىنشە، جوعالعانداردىڭ تۋىستارى ىزدەۋ توبىنىڭ قۇرامىندا سوربۇلاق كولىن اينالىپ ءوتىپ، اۋەدەن سۋ ءتۇبىن كورۋ مۇمكىن ەمەستىگىنە كوز جەتكىزگەن.

ىزدەستىرۋ وپەراسياسىنا 400-دەن اسا ادام، كينولوگيالىق توپتار، 70-تەن اسا جەرۇستى تەحنيكاسى، 21 ءجۇزۋ قۇرالى، 10 ۇۇا، ەحولوتتار، سۋاستى سكانەرلەۋ قۇرالدارى جۇمىلدىرىلعان.