Jeltoqsannyń 25-i kúni Aqtaýda Azerbaijan Airlines kompaniiasynyń reisi kezinde ushaq apatynan qaza tapqandar sany 38 adamǵa jetken. Ókinishke orai borttaǵy alty qazaqstandyqtyń eshqaisysy aman qalmady. Qaza bolǵan Qazaqstan azamattarynyń arasynda Mańǵystaý oblysynyń eki munaishysy Baýyrjan Jumaǵulov pen Sándibek Tólesinov bar. Olar Qazaqstan Respýblikasy Kásipodaqtar federatsiiasynyń quramyna kiretin kásipodaqtardyń músheleri boldy. Erteń munaishylardy aqtyq saparǵa shyǵaryp salady.
Baýyrjan Jumaǵulov 39 jasta, sońǵy 16 jylda «ÓzenMunaiServis» JShS munai servisinde jumys istegen. Uńǵymalardy kúrdeli jóndeý brigadasynyń 4-razriadty burǵylaýshy kómekshisi óz isine asa jaýapkershilikpen qaraityn, áriptesterine árdaiym kómekke keletin, dostyq qarym-qatynasty jaqsy biletin jan bolǵan. Kásiporynnyń kásipodaq komiteti atap ótkendei, Baýyrjan Jumaǵulov kásipodaqtyń jigerli, belsendi múshesi edi. Onyń úlesiniń arqasynda kásiporynda Jas mamandar keńesi quryldy. Baýyrjan Jumaǵulov adal jar, alty balanyń ákesi, balalaryn otansúigishtikke, týǵan jerine degen súiispenshilikke tárbielegen.
YNTYMAQ salalyq kásipodaq uiymy Aqtaý mańynda apatqa ushyraǵan ushaqta kásipodaq komitetiniń múshesi, «Ózenmunaigaz» AQ merdiger uiymy -«MunaiFildServis» JShS mehanika-energetika bóliminiń injeneri Sándibek Tólesinovtyń bolǵanyna áli de sene almai otyr.
36 jastaǵy Sándibek Tólesinov te 16 jyldyq ómirin elimizdiń munai salasyn damytýǵa arnady. Ol burǵylaý qondyrǵysyndaǵy jabdyqty joǵary deńgeide meńgergen kásibi maman edi. Áriptester ony ar-ojdany mol, isin jetik biletin adal jigit dep sipattaidy. Artynda anasy, jubaiy jáne tórt balasy qaldy.
Baýyrjan Jumaǵulov pen Sándibek Tólesinov jaqsy dos bolǵan. Dostar demalystaryn kórshi Reseige barýdy uiǵaryp, jańa jyldyq merekelerge deiin úilerine qaitýdy josparlaǵan.
Qazaqstan Respýblikasy Kásipodaqtar federatsiiasynyń tóraǵasy Satybaldy Dáýletalin marqum munaishylardyń otbasy men jaqyndaryna kóńil aitý hatyn joldady. Qaitys bolǵan kásipodaq músheleriniń týystaryna materialdyq jáne moraldyq qoldaý kórsetiledi.
Qazaqstan Respýblikasy Kásipodaqtar federatsiiasynyń media ortalyǵy
