جەلتوقساننىڭ 25ء-ى كۇنى اقتاۋدا Azerbaijan Airlines كومپانياسىنىڭ رەيسى كەزىندە ۇشاق اپاتىنان قازا تاپقاندار سانى 38 ادامعا جەتكەن. وكىنىشكە وراي بورتتاعى التى قازاقستاندىقتىڭ ەشقايسىسى امان قالمادى. قازا بولعان قازاقستان ازاماتتارىنىڭ اراسىندا ماڭعىستاۋ وبلىسىنىڭ ەكى مۇنايشىسى باۋىرجان جۇماعۇلوۆ پەن ساندىبەك تولەسىنوۆ بار. ولار قازاقستان رەسپۋبليكاسى كاسىپوداقتار فەدەراسياسىنىڭ قۇرامىنا كىرەتىن كاسىپوداقتاردىڭ مۇشەلەرى بولدى. ەرتەڭ مۇنايشىلاردى اقتىق ساپارعا شىعارىپ سالادى.
باۋىرجان جۇماعۇلوۆ 39 جاستا، سوڭعى 16 جىلدا «وزەنمۇنايسەرۆيس» ج ش س مۇناي سەرۆيسىندە جۇمىس ىستەگەن. ۇڭعىمالاردى كۇردەلى جوندەۋ بريگاداسىنىڭ 4-رازريادتى بۇرعىلاۋشى كومەكشىسى ءوز ىسىنە اسا جاۋاپكەرشىلىكپەن قارايتىن، ارىپتەستەرىنە ءاردايىم كومەككە كەلەتىن، دوستىق قارىم-قاتىناستى جاقسى بىلەتىن جان بولعان. كاسىپورىننىڭ كاسىپوداق كوميتەتى اتاپ وتكەندەي، باۋىرجان جۇماعۇلوۆ كاسىپوداقتىڭ جىگەرلى، بەلسەندى مۇشەسى ەدى. ونىڭ ۇلەسىنىڭ ارقاسىندا كاسىپورىندا جاس ماماندار كەڭەسى قۇرىلدى. باۋىرجان جۇماعۇلوۆ ادال جار، التى بالانىڭ اكەسى، بالالارىن وتانسۇيگىشتىككە، تۋعان جەرىنە دەگەن سۇيىسپەنشىلىككە تاربيەلەگەن.
YNTYMAQ سالالىق كاسىپوداق ۇيىمى اقتاۋ ماڭىندا اپاتقا ۇشىراعان ۇشاقتا كاسىپوداق كوميتەتىنىڭ مۇشەسى، «وزەنمۇنايگاز» اق مەردىگەر ۇيىمى -«مۇنايفيلدسەرۆيس» ج ش س مەحانيكا-ەنەرگەتيكا ءبولىمىنىڭ ينجەنەرى ساندىبەك تولەسىنوۆتىڭ بولعانىنا ءالى دە سەنە الماي وتىر.
36 جاستاعى ساندىبەك تولەسىنوۆ تە 16 جىلدىق ءومىرىن ەلىمىزدىڭ مۇناي سالاسىن دامىتۋعا ارنادى. ول بۇرعىلاۋ قوندىرعىسىنداعى جابدىقتى جوعارى دەڭگەيدە مەڭگەرگەن كاسىبي مامان ەدى. ارىپتەستەر ونى ار-وجدانى مول، ءىسىن جەتىك بىلەتىن ادال جىگىت دەپ سيپاتتايدى. ارتىندا اناسى، جۇبايى جانە ءتورت بالاسى قالدى.
باۋىرجان جۇماعۇلوۆ پەن ساندىبەك تولەسىنوۆ جاقسى دوس بولعان. دوستار دەمالىستارىن كورشى رەسەيگە بارۋدى ۇيعارىپ، جاڭا جىلدىق مەرەكەلەرگە دەيىن ۇيلەرىنە قايتۋدى جوسپارلاعان.
قازاقستان رەسپۋبليكاسى كاسىپوداقتار فەدەراسياسىنىڭ ءتوراعاسى ساتىبالدى داۋلەتالين مارقۇم مۇنايشىلاردىڭ وتباسى مەن جاقىندارىنا كوڭىل ايتۋ حاتىن جولدادى. قايتىس بولعان كاسىپوداق مۇشەلەرىنىڭ تۋىستارىنا ماتەريالدىق جانە مورالدىق قولداۋ كورسەتىلەدى.
قازاقستان رەسپۋبليكاسى كاسىپوداقتار فەدەراسياسىنىڭ مەديا ورتالىعى
