Dálel bolǵanymen, keibir sheteldik kompaniialardyń ókilderine qatysty sheshim qabyldanbaǵan bolyp shyqty. Prokýrorǵa qaitarylǵan qylmystyq is boiynsha negizinen jeti sheneýnik qamaýǵa alynǵan edi. Úkimniń kúshi joiylǵanymen, olar jańa úkim shyqqansha temir torda qala bermek.
«Astana LRT» isi boiynsha sot byltyr kúzde bastalyp, núktesi 28-mamyrda bir-aq qoiylǵan edi. Jeti ai aralyqta sot zalynda prokýrorlardyń keltirgen dálelderine kelisken sýdialardyń sheshimin búgin olardyń sot alqasyndaǵy áriptesi toqtatty.
Sóitse qylmystyq istiń túzeitin tustary kóp eken. Máselen, kei sheteldik kompaniialardyń ókilderine qatysty sheshim qabyldanbaǵany anyqtalypty.
– Sot alqasy qaýly etti. Qylmystyq ister jónindegi mamandandyrylǵan aýdanaralyq sotynyń 2021 jylǵy 28 mamyrdaǵy Rashid Amanjolov, Janat Nurpeiisov, Talǵat Áshim, Ulyqbek Achilov, Timýr Qasabaev, Dýlat Mýsenov, Dáýren Ábdihamitovke qatysty úkiminiń kúshi joiyldy. Qylmystyq is júrgizý zańnamasynyń basty sot talqylaýyna kedergi keltiretin eleýli zań buzýshylyqtary men normalaryn joiý úshin qylmystyq is Nur-Sultan qalasynyń prokýroryna qaitaryldy, – dedi Nur-Sultan qalasy qylmystyq ister jónindegi sot alqasynyń sýdiasy Abai Kókjalov.
Qylmystyq is prokýrorǵa qaitarylsa da, «Astana LRT» isine qatysy bar dep tanylyp, sottalǵandar temir torda qala beredi. Sot jazasyn ótep jatqan jeteýge «qamaýda ustaý» bultartpaý sharasyn ózgerissiz qaldyrdy.
Onyń merzimi prokýratýraǵa kelip túsken kúnnen bastap bir aiǵa uzartylǵan. Al aiyptalýshylardyń advokattary bul sheshimge qarsy. Olar qorǵaýyndaǵylardyń úiqamaqqa shyǵýyn talap etýde. Óitkeni sot barysyndaǵy qatelikter shash etekten ekenin aitýda.
– Sot óziniń sheshimin aýditorlyq saraptamalarǵa negizdegen. Biraq biz saraptamalardy, aýditorlyq saraptamalardy teksergen kezde qatelikter taptyq. Sotta bul qatelikter jaily aittyq. Mysalǵa bul is LRT jaily emes, bul BRT, iaǵni avtobýs jolyn salý jaily. Is boiynsha sottalǵan 7 adamnyń LRT-ge qatysy joq, – deidi advokat Dina Amanjolova.
Buǵan deiin jazasyn óteýshiler ózine taǵylǵan aiypqa qarsylyq tanytyp, túrli áreketterge barǵan bolatyn. Ásirese 8 jyl men 10 jylǵa qamalǵandar túrmede ashtyq jariialap shý shyǵarǵan edi. Keibiriniń densaýlyǵy nasharlap aýrýhanadan bir-aq shyqqan bolatyn.
Halyq arasynda «jemqorlyq eskertkishi» atalyp ketken bul baǵanalarmen jumys ótkende bastalǵan. Qazir júrip jatyr. Qarjy jaǵyn da elorda biligi investorlardy tartyp sheshimiz degendei bolǵan. Al buryn bólingen milliardtar ushty-kúili joq.
Qomaqty qarjyny qaltasyna basqan Talǵat Ardan men Qanat Sultanbekov shetelde jaibaraqat júr. Jaqynda májilismender «Interpol olardy izdemei jatyr, tipti olar tizimde joq» dep Bas prokýratýrany aiyptaǵan. Al Bas prokýratýradan áli jaýap joq.
