دالەل بولعانىمەن، كەيبىر شەتەلدىك كومپانيالاردىڭ وكىلدەرىنە قاتىستى شەشىم قابىلدانباعان بولىپ شىقتى. پروكۋرورعا قايتارىلعان قىلمىستىق ءىس بويىنشا نەگىزىنەن جەتى شەنەۋنىك قاماۋعا الىنعان ەدى. ۇكىمنىڭ كۇشى جويىلعانىمەن، ولار جاڭا ۇكىم شىققانشا تەمىر توردا قالا بەرمەك.
«استانا LRT» ءىسى بويىنشا سوت بىلتىر كۇزدە باستالىپ، نۇكتەسى 28-مامىردا ءبىر-اق قويىلعان ەدى. جەتى اي ارالىقتا سوت زالىندا پروكۋرورلاردىڭ كەلتىرگەن دالەلدەرىنە كەلىسكەن سۋديالاردىڭ شەشىمىن بۇگىن ولاردىڭ سوت القاسىنداعى ارىپتەسى توقتاتتى.
سويتسە قىلمىستىق ءىستىڭ تۇزەيتىن تۇستارى كوپ ەكەن. ماسەلەن، كەي شەتەلدىك كومپانيالاردىڭ وكىلدەرىنە قاتىستى شەشىم قابىلدانباعانى انىقتالىپتى.
– سوت القاسى قاۋلى ەتتى. قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 2021 جىلعى 28 مامىرداعى راشيد امانجولوۆ، جانات نۇرپەيىسوۆ، تالعات ءاشىم، ۇلىقبەك اچيلوۆ، تيمۋر قاسابايەۆ، دۋلات مۋسەنوۆ، داۋرەن ابدىحاميتوۆكە قاتىستى ۇكىمىنىڭ كۇشى جويىلدى. قىلمىستىق ءىس جۇرگىزۋ زاڭناماسىنىڭ باستى سوت تالقىلاۋىنا كەدەرگى كەلتىرەتىن ەلەۋلى زاڭ بۇزۋشىلىقتارى مەن نورمالارىن جويۋ ءۇشىن قىلمىستىق ءىس نۇر-سۇلتان قالاسىنىڭ پروكۋرورىنا قايتارىلدى، – دەدى نۇر-سۇلتان قالاسى قىلمىستىق ىستەر جونىندەگى سوت القاسىنىڭ سۋدياسى اباي كوكجالوۆ.
قىلمىستىق ءىس پروكۋرورعا قايتارىلسا دا، «استانا LRT» ىسىنە قاتىسى بار دەپ تانىلىپ، سوتتالعاندار تەمىر توردا قالا بەرەدى. سوت جازاسىن وتەپ جاتقان جەتەۋگە «قاماۋدا ۇستاۋ» بۇلتارتپاۋ شاراسىن وزگەرىسسىز قالدىردى.
ونىڭ مەرزىمى پروكۋراتۋراعا كەلىپ تۇسكەن كۇننەن باستاپ ءبىر ايعا ۇزارتىلعان. ال ايىپتالۋشىلاردىڭ ادۆوكاتتارى بۇل شەشىمگە قارسى. ولار قورعاۋىنداعىلاردىڭ ءۇيقاماققا شىعۋىن تالاپ ەتۋدە. ويتكەنى سوت بارىسىنداعى قاتەلىكتەر شاش ەتەكتەن ەكەنىن ايتۋدا.
– سوت ءوزىنىڭ شەشىمىن اۋديتورلىق ساراپتامالارعا نەگىزدەگەن. ءبىراق ءبىز ساراپتامالاردى، اۋديتورلىق ساراپتامالاردى تەكسەرگەن كەزدە قاتەلىكتەر تاپتىق. سوتتا بۇل قاتەلىكتەر جايلى ايتتىق. مىسالعا بۇل ءىس لرت جايلى ەمەس، بۇل برت، ياعني اۆتوبۋس جولىن سالۋ جايلى. ءىس بويىنشا سوتتالعان 7 ادامنىڭ لرت-گە قاتىسى جوق، – دەيدى ادۆوكات دينا امانجولوۆا.
بۇعان دەيىن جازاسىن وتەۋشىلەر وزىنە تاعىلعان ايىپقا قارسىلىق تانىتىپ، ءتۇرلى ارەكەتتەرگە بارعان بولاتىن. اسىرەسە 8 جىل مەن 10 جىلعا قامالعاندار تۇرمەدە اشتىق جاريالاپ شۋ شىعارعان ەدى. كەيبىرىنىڭ دەنساۋلىعى ناشارلاپ اۋرۋحانادان ءبىر-اق شىققان بولاتىن.
حالىق اراسىندا «جەمقورلىق ەسكەرتكىشى» اتالىپ كەتكەن بۇل باعانالارمەن جۇمىس وتكەندە باستالعان. ءقازىر ءجۇرىپ جاتىر. قارجى جاعىن دا ەلوردا بيلىگى ينۆەستورلاردى تارتىپ شەشىمىز دەگەندەي بولعان. ال بۇرىن بولىنگەن ميللياردتار ۇشتى-كۇيلى جوق.
قوماقتى قارجىنى قالتاسىنا باسقان تالعات اردان مەن قانات سۇلتانبەكوۆ شەتەلدە جايباراقات ءجۇر. جاقىندا ماجىلىسمەندەر «ينتەرپول ولاردى ىزدەمەي جاتىر، ءتىپتى ولار تىزىمدە جوق» دەپ باس پروكۋراتۋرانى ايىپتاعان. ال باس پروكۋراتۋرادان ءالى جاۋاپ جوق.
