KHDR basshysy Kim Chen Yn Áskeri-teńiz kúshterine qarasty nysanǵa baryp, iadrolyq qozǵaltqyshy bar, salmaǵy shamamen 8700 tonnany quraityn strategiialyq súńgýir qaiyqtyń qurylys barysymen tanysty. Bul týraly TsTAK agenttigi málimdedi, dep habarlaidy Dalanews.kz.
Agenttik málimetinshe, Kim Chen Yn súńgýir qaiyqtyń qurylysyn jeke ózi qarap, qazirgi kezeń boiynsha baiandama tyńdaǵan. Onymen birge keme jasaý salasynyń basshylary men qorǵanys ǵylymynyń ókilderi bolǵan.
Atalǵan súńgýir qaiyq basqarylatyn zymyrandardy ushyrýǵa arnalǵan strategiialyq atomdyq keme retinde sipattalady. Joba Koreianyń Eńbek partiiasynyń VIII sezinde bekitilgen eldiń qorǵanys áleýetin damytýǵa baǵyttalǵan bes negizgi mindettiń qataryna kiredi.
Kim Chen Ynnyń aitýynsha, mundai súńgýir qaiyqty salý – KHDR-dyń derbes qorǵanys saiasatyn iske asyrýdaǵy mańyzdy qadam. Phenian biligi qýatty shabýyl múmkindikterin ulttyq qaýipsizdikti qorǵaý men tejeýdiń basty tetigi retinde qarastyrady.
TsTAK málimetinshe, jańa atomdyq súńgýir qaiyqtyń qurylysy aiaqtalsa, bul eldiń áskeri-teńiz kúshteri úshin betburys kezeń bolady.
Sondai-aq Kim Chen Yn Ońtústik Koreianyń AQSh qoldaýymen atomdyq súńgýir qaiyq jasaýdy josparlap otyrǵanyn synǵa alyp, ony KHDR qaýipsizdigi men teńiz egemendigine tóngen qater dep atady.
KHDR basshysy elde sonymen qatar soqqy beretin esminetster men basqa da atomdyq súńgýir qaiyqtardyń qurylysy jalǵasyp jatqanyn, jańa sýasty qarýlary ázirlenip jatqanyn málimdedi. Ol flotty kúsheitý kemelerdiń qurylys qarqyny men aýqymyn arttyrý, sondai-aq olardy túrli shabýyl júielerimen jabdyqtaý arqyly júzege asatynyn aitty.
Alaida KHDR málimdegen súńgýir qaiyqtyń tehnikalyq sipattamalaryn táýelsiz túrde rastaý múmkin emes. Phenian mundai derekterdi jariialamaidy ári syrtqy baqylaýshylardy áskeri nysandarǵa kirgizbeidi. Sarapshylardyń aitýynsha, Soltústik Koreia buǵan deiin de qarý-jaraqtyń maketteri men prototipterin kórsetip, olardyń daiyndyq deńgeiin asyra baǵalaǵan jaǵdailar bolǵan.
