Jasyratyny joq, sodan beri kórshi Resei halqy bul reformany qazaqtardan az talqylaǵan joq.
Birazy jaqtasa, kóbi «orys áleminen alystap barasyńdar» dep qabaq shytty. Al, kúni keshe «Rossiia 1» telearnasynan tikelei efirde shyǵatyn «Voskresnyi vecher» tok-shoýynda orys saiasatkerleri men telejúrgizýshi Vladimir Solovev qazaqtyń tilin mazaq etip, elde maidan bolýy múmkin dep qorqytty.
Solovevtiń jeksenbilik keshi bul joly AQSh pen jaqtastarynyń Siriiany atqylaýyna arnaldy.
Talqylaý barysynda telejúrgizýshi «Qazaqstan ne úshin bul turǵyda Reseidi jaqtap, sózin sóilegen joq» degen másele kóterdi.
Este bolsa, Qazaqstan biligi osydan birer kún buryn «Siriiadaǵy jaǵdai qarýmen emes, saiasi-beibit jolmen sheshilýi tiis» degen pikirin aitqan bolatyn.
Al, orys saiasakerleri men saiasattanýshylarynyń pikirinshe, Qazaqstan biligi AQSh-ty aiyptap, Siriia men Resei biligin «qolpashtaýy» kerek eken.
Osylai dep qazaq kórshilerine renishterin bildirgen Solovev pen onyń qonaqtary Qazaqstannyń Reseiden alshaqtap bara jatqanyn aitty.
Tipti, latyn alfavitine kóshýimizdi mazaq etip, Qazaqstanda Ýkrainadaǵydai maidan bolýy múmkin degendi aityp qaldy.
«Qazaqstanmen bizdiń alians qandai ózi? Olar nege únsiz qaldy bizge qoldaý bildirmei? Biz bilmeitin shyǵarmyz, bálkim aramyzdan qara mysyq kesip ótken bolar? Álde kelesi maidannyń Qazaqstanda bolatynyn kútemiz be?» – dedi telejúrgizýshi Vladimir Solovev stýdiia qonaqtaryna.
«Ókinishke qarai, Qazaqstan táýelsizdik alǵan ýaqyttan beri aqyryndap qazaqylanyp barady. Máselen, 91-jylǵa deiin elde orystardyń sany kóp bolsa, qazir az ulttardyń birine ainaldy» – dep Zatýlin ókinishimen bólisti.
https://dalanews.kz/11646
