Resei prezidenti Vladimir Pýtin Ýkrain halqy men reseilikterdiń qaza tabýyna ózin jaýapty dep sanamaidy. Bul týraly ol amerikalyq NBC telearnasynyń tilshisiniń suraǵyna jaýap berý barysynda aitty, dep habarlady Dalanews.kz
BBC-diń orys qyzmetiniń tilshisi Donald Tramptyń Ýkrainaǵa qatysty josparyna jáne soǵystaǵy jaýapkershilik máselesine toqtalyp, Pýtin 2026 jyly da adam ólimi úshin ózin jaýapty sezine me dep surady.
«Biz adam ólimine ózimizdi jaýapty sanamaimyz, óitkeni soǵysty biz bastaǵan joqpyz», – dedi Vladimir Pýtin.
Ol 2014 jyly Ýkrainada «antikonstitýtsiialyq tóńkeris boldy» degen ustanymyn taǵy qaitalady.
Resei basshysynyń aitýynsha, 2022 jyldyń aqpanynda Kreml qarýly kúshterdi qoldanýǵa «májbúr bolǵan», sebebi bul qaqtyǵys Kiev tarapynan, Batystyń qoldaýymen bastalǵan. Pýtin osy nusqasyn qaitadan eske saldy.
Sonymen qatar, Pýtin Donald Tramptyń qaqtyǵysty beibit jolmen retteýge «shynaiy ári baiypty kúsh salyp jatqanyn» aitty. Onyń sózinshe, tamyz aiynda Ankoridjde ótken sammitte taraptar Tramptyń usynystaryn «negizinen kelisip qoiǵan».
«Biz qandai da bir usynystardan bas tartyp otyrmyz deý – shyndyqqa janaspaidy», – dedi Pýtin.
Onyń aitýynsha, bul sheshimder Resei úshin ońai emes, degenmen usynylǵan ymyraǵa kelisken.
Resei prezidenti qaqtyǵysty retteý máselesindegi jaýapkershilik «tolyqtai Ýkraina men onyń eýropalyq odaqtastarynyń tarapynda» dep sanaidy. Sonymen birge ol Reseidiń kelissózderge de, qaqtyǵysty beibit jolmen aiaqtaýǵa da daiyn ekenin málimdedi.
