Osy oraida, Dalanews.kz tilshisi Májilis depýtaty Ermurat Bapiǵa habarlasyp, joǵarydaǵy boljamnyń aq-qarasyn surap kórgen. Ol da Álihan Smaiylovtyń doǵarysy (otstavka) týraly sóz bilik dálizderinde birazdan beri aitylyp júrgenin alǵa tartty. Bul týrasynda Parlament depýtattary arasynda da ártúrli alypqashpa áńgimeler bar kórinedi.
"Anyǵynda, premer Smaiylovtyń doǵarysy týraly mundai sózdiń qaýlap ketýiniń ózi búgingi Ministrler Kabinetiniń jumysyna qoǵamnyń ǵana emes, saiasi elitadaǵy kóńiltolmaýshylyqtyń saldary ekenin moiyndaý kerek. Parlamenttiń byltyrǵy kúzgi sessiiasy ashylǵan kezde, QR Úkimetine senim bildirý máselesi qaralǵan kezde, men qarsy daýys bergen edim", - dedi E.Bapi.
Depýtat bul qarsylyǵynyń basty sebebin "búgingi Úkimet órtsóndirýshilik qyzmetten asa alamady" dep túsindirdi. Durysynda, ekonomikadaǵy daǵdarysty jaǵdaidy aýyzdyqtaý, kún ótken saiyn asqynyp bara jatqan qymbatshylyqqa qarsy úkimettik baǵdarlama jasai almady. Jylý-energetika salasynda reformalyq ózgerister jasamaq túgili, Eski Qazaqstannyń oligarhtary ielengen strategiialyq nysandardyń apatty jaǵdaiyna arasha túse almaýda.
"Premerdiń ózinde de, onyń Kabinetiniń múshelerinde de kásibi adýyndy minez joq. Olardyń ártúrli jiyndarda, Úkimet otyrystarynda tompiyp otyrǵan túrine qarap, sanaǵa eldegi ekonomikalyq jaǵdai túzeledi degen senim uialatý múmkin emes", - halyq qalaýlysy.
Alaida, ol Álihan Smaiylovty doǵarysqa ketirýge depýtattardyń barlyǵy ashyq qulshynyp otyr dep aita almaidy. Qalyptasqan zań talaptary boiynsha, el prezidentiniń taǵaiyndaýyna premer-ministrdi sailaýda jeńip shyqqan partiia usynady. Al bizde sońǵy sailaýdyń jeńimpazy «Amanat» partiiasy ekeni málim.
"Sondyqtan partiialyq-korporotivtik tártipke moiynsunýy tiis «amanattyq» depýtattardyń deni óz oi-tujyrymyn ashyq aita almaidy. Biraq Parlamenttiń aýasynda Smaiylovtyń úkimeti otstavkaǵa ketedi degen saǵym kezip júrgeni ras.
Eger taǵy da búgingi úkimetke senim bildirý jóninde parlamenttik plibestsit ótetin bolsa, depýtattar korpýsynyń basym bóligi Kabminniń doǵarysyna daýys beredi dep oilaimyn", - dedi Ermurat Bapi.
Rasynda, qalai bolǵanda da, qoldanystaǵy zańnamalar boiynsha, bul oraidaǵy sońǵy sózin el prezidenti Qasym-Jomart Toqaev qana aita alady.
