Qazaqstanda Smart Cargo tsifrlyq platformasynyń arqasynda shekaradan ótý ýaqyty 4 saǵattan 30 minýtqa deiin qysqarýy múmkin, dep habarlaidy Dala News.
Bul týraly Úkimet otyrysynda Nurlan Saýranbaev málimdedi.
Ministrdiń aitýynsha, kólik logistika salasyna jasandy intellekt engizý protsesterdi jeńildetýge, shyǵyndardy azaitýǵa jáne eldiń tranzittik áleýetin arttyrýǵa baǵyttalǵan. Negizgi quraldardyń biri Smart Cargo platformasy boldy.
Júie QR kodtar arqyly júk týraly derekterge qol jetkizýdi qamtamasyz etedi, qujattardy avtomatty tekseredi, marshrýttardy qurady jáne qajetti ruqsattardy anyqtaidy. Nátijesinde shekaradan ótý ýaqyty aitarlyqtai qysqarady.
Temirjol salasynda da tsifrlandyrý júrip jatyr. Sonyń biri KinetiX júiesi. Buryn vagondardy tekserý 2 saǵatqa deiin ýaqyt alsa, qazir ol 8 minýtqa deiin qysqarǵan. Júie naqty ýaqyt rejiminde 9 parametr boiynsha diagnostika júrgizip, aqaýlardy avtomatty anyqtaidy jáne boljaidy.
Avtokólik salasynda da intellektýaldy baqylaý engizilýde. Jasandy intellekt marshrýttardy taldap, salmaq ólsheý stansalarymen derekterdi salystyrady jáne zańbuzýshylyqtardy avtomatty túrde anyqtaidy. Bul joldardyń tozýyn azaitýǵa múmkindik beredi.
«Biryńǵai intellektýaldy kólik júiesi E-Kólik qalyptasýda. Platforma QazTech bazasynda qurylady jáne barlyq kólik túrlerin biriktiredi. Bul derekterdi jinaýǵa, óńdeýge, kólik aǵyndaryn boljaýǵa jáne sheshimderdi avtomatty túrde qabyldaýǵa múmkindik beredi», – dedi ministr.
Onyń aitýynsha, kólik salasy derekterdiń eń iri generatorlarynyń biri bolǵandyqtan, jasandy intellekt olardy óńdeýdiń negizgi quralyna ainalady. Al E-Kólik júiesi salany aldyn ala basqarýǵa múmkindik beredi.
