1 naýryzdan bastap FlyArystan áýe kompaniiasynda jańa bas direktor qyzmetine Iohan Eidhagen kirisedi. Ol buǵan deiin Wizz Air Abu Dhabi áýe kompaniiasyn basqarǵan, dep habarlaidy Dalanews.kz.
Al qazirgi bas direktor Richard Ledjer Air Astana toby quramynda jańa qyzmetke aýysyp, seriktestikter men alianstar jónindegi vitse-prezident bolyp taǵaiyndalmaq.
Aita keteiik, FlyArystan áýe kompaniiasy jyldar boiy synnan kóz ashpai keledi. Byltyr Monopoliiaǵa qarsy organ "Fly Arystan" áýe tasymaldaýshysy tarapynan ústem jaǵdaidy teris paidalaný belgilerin anyqtady. Taldaý barysynda aviabiletterdiń quny brondaýdyń ártúrli kezeńderinde avtomatty túrde qosylatyn jasyryn qosymsha aqylar esebinen óskeni anyqtalǵan edi.
Al jaqynda áleýmettik jelilerde taraǵan jemqorlyq sipatyndaǵy málimetterden keiin Bas kólik prokýratýrasy Air Astana jáne onyń qurylymy Fly Arystan áýekompaniialarynyń qyzmetine tekseris bastaýdy qolǵa alǵany týraly jazǵanbyz.
Prokýratýranyń málimetinshe, jariialanǵan materialdarda jeńildetilgen aviabiletterdi kompaniia basshylyǵynyń nusqaýymen top-menedjmenttiń týystaryna jáne ózge de «arnaiy adamdarǵa» berý derekteri aitylǵan. Osyǵan bailanysty Azamattyq aviatsiia komitetine eki áýekompaniianyń qyzmetin tekserý týraly talap joldanǵan.
Janjal Fly Arystan-nyń burynǵy top-menedjeri Renat Abýlhanovtyń atynan jariialanǵan jazbalardan keiin órshidi. Onda «blat» júiesi arqyly Air Astana basshylyǵynyń ókilderi men olardyń jaqyndaryna eń tómengi tarifpen biletter rásimdelgeni aitylǵan. Atap aitqanda, aviakompaniia prezidenti Piter Fosterdiń jubaiy Tatiana Fosterge, onyń ápkesi men anasyna jeńildetilgen biletter berilgeni kórsetiledi.
