Qazaqstannyń Syrtqy ister ministrligi Reseidiń Altai Respýblikasynda bolǵan jol apatynan zardap shekken Qazaqstan azamattaryna konsýldyq-quqyqtyq kómek kórsetip, qaza tapqandardyń máiitin elge jetkizý jumystaryn uiymdastyryp jatyr, dep habarlaidy dalanews.kz.
Ministrliktiń málimetinshe, qazaqstandyq diplomattar jergilikti bilik organdarymen, meditsinalyq mekemelermen jáne zardap shekkenderdiń týystarymen jedel bailanys ornatqan.
Qazirgi ýaqytta zardap shekken azamattarǵa qajetti konsýldyq-quqyqtyq kómek kórsetilip, qaza tapqandardyń máiitin Qazaqstanǵa jetkizý máselesi pysyqtalýda. Vedomstvo bul másele erekshe baqylaýda ekenin atap ótti.
Eske salaiyq, jol-kólik oqiǵasy 27 shilde kúni Reseidiń Altai Respýblikasyndaǵy Ulaǵan aýdanynda bolǵan. Jol apaty saldarynan Qazaqstannyń eki azamaty oqiǵa ornynda kóz jumdy.
Taǵy bir qazaqstandyq túrli dárejedegi jaraqat alyp, Gorno-Altaisk qalasyndaǵy respýblikalyq klinikalyq aýrýhanaǵa shuǵyl jetkizilgen.
Syrtqy ister ministrligi Resei tarapynyń quzyrly organdarymen, dárigerlermen jáne zardap shekkenderdiń týystarymen turaqty bailanys jalǵasyp jatqanyn málimdedi.
