QR Ulttyq qaýipsizdik komitetiniń Sybailas jemqorlyqqa qarsy is-qimyl qyzmetiniń jańa basshysyn taǵaiyndaldy. Memleket basshysynyń ókimimen bul jaýapty laýazymǵa Nurjan Maratuly Qusaiynov keldi. Bul tek kadrlyq aýys-túiis emes, eldiń ishki qaýipsizdik qurylymyndaǵy strategiialyq mańyzy bar sektorǵa jańa lep, jańa tásil, jańa senim qajet ekenin ańǵartatyn belgi. Sebebi sybailas jemqorlyqqa qarsy kúres – búgingi Qazaqstan úshin tek quqyqtyq emes, ulttyq turaqtylyq pen áleýmettik ádilettilikke tikelei áser etetin sala.
Nurjan Qusaiynovtyń bul salaǵa kezdeisoq kelmegeni anyq. Ol – ulttyq qaýipsizdik salasynda tájiribesi bar, memlekettik basqarýdyń spetsifikasyn, quqyqtyq mehanizmderdiń shekarasyn, sondai-aq kóleńkeli shemalarmen kúrestiń naqty ádistemesin meńgergen kadr. Onyń bul qyzmetke kelýi antikorrýptsiialyq saiasattyń tek deklaratsiia emes, naqty qurylym arqyly júzege asýy tiis ekenin kórsetedi.
Sybailas jemqorlyqqa qarsy is-qimyl qyzmeti – quqyqtyq baqylaýdan góri júielik aldyn alý fýnktsiiasymen erekshelenetin organ. Sońǵy jyldary bul qurylym «Antikor» brendiniń ainalasyna shoǵyrlanǵanymen, onyń shynaiy qýaty men qoǵamdaǵy bedeli kadrlyq turaqtylyq pen saiasi erikke táýeldi bolyp keldi.
Endigi jerde Qusaiynov basqaratyn qyzmettiń basty mindeti – tek derektermen jumys isteý emes, institýtsionaldy senimdi qalpyna keltirý, óńirlik basqarmalar men ortalyq bilik arasyndaǵy úilesimdilikti kúsheitý, strategiialyq baqylaýdy tereńdetý.
Nurjan Qusaiynovtyń taǵaiyndalýy – osy maqsatqa jaqyndaýdyń múmkindigi. Ol aldaǵy ýaqytta bul qyzmetti institýtsionaldyq qaita qaraý, zamanaýi tsifrlyq baqylaý tetikterin engizý, jáne qoǵammen ashyq dialog ornatý baǵytynda damytatyn bolady. Sybailas jemqorlyqpen kúres – bir adamnyń nemese bir mekemeniń ǵana mindeti emes. Bul – memlekettiń ishki turaqtylyǵy men halyqtyń bilikke degen senimi arasyndaǵy altyn kópir. Endi sol kópirdiń jańa kúzetshisi bar.
