ҚР Ұлттық қауіпсіздік комитетінің Сыбайлас жемқорлыққа қарсы іс-қимыл қызметінің жаңа басшысын тағайындалды. Мемлекет басшысының өкімімен бұл жауапты лауазымға Нұржан Маратұлы Құсайынов келді. Бұл тек кадрлық ауыс-түйіс емес, елдің ішкі қауіпсіздік құрылымындағы стратегиялық маңызы бар секторға жаңа леп, жаңа тәсіл, жаңа сенім қажет екенін аңғартатын белгі. Себебі сыбайлас жемқорлыққа қарсы күрес – бүгінгі Қазақстан үшін тек құқықтық емес, ұлттық тұрақтылық пен әлеуметтік әділеттілікке тікелей әсер ететін сала.

Нұржан Құсайыновтың бұл салаға кездейсоқ келмегені анық. Ол – ұлттық қауіпсіздік саласында тәжірибесі бар, мемлекеттік басқарудың спецификасын, құқықтық механизмдердің шекарасын, сондай-ақ көлеңкелі схемалармен күрестің нақты әдістемесін меңгерген кадр. Оның бұл қызметке келуі антикоррупциялық саясаттың тек декларация емес, нақты құрылым арқылы жүзеге асуы тиіс екенін көрсетеді.

Сыбайлас жемқорлыққа қарсы іс-қимыл қызметі – құқықтық бақылаудан гөрі жүйелік алдын алу функциясымен ерекшеленетін орган. Соңғы жылдары бұл құрылым «Antikor» брендінің айналасына шоғырланғанымен, оның шынайы қуаты мен қоғамдағы беделі кадрлық тұрақтылық пен саяси ерікке тәуелді болып келді.

Ендігі жерде Құсайынов басқаратын қызметтің басты міндеті – тек деректермен жұмыс істеу емес, институционалды сенімді қалпына келтіру, өңірлік басқармалар мен орталық билік арасындағы үйлесімділікті күшейту, стратегиялық бақылауды тереңдету.

Нұржан Құсайыновтың тағайындалуы – осы мақсатқа жақындаудың мүмкіндігі. Ол алдағы уақытта бұл қызметті институционалдық қайта қарау, заманауи цифрлық бақылау тетіктерін енгізу, және қоғаммен ашық диалог орнату бағытында дамытатын болады. Сыбайлас жемқорлықпен күрес – бір адамның немесе бір мекеменің ғана міндеті емес. Бұл – мемлекеттің ішкі тұрақтылығы мен халықтың билікке деген сенімі арасындағы алтын көпір. Енді сол көпірдің жаңа күзетшісі бар.