AQSh prezidenti Donald Tramp Qytai Halyq Respýblikasynyń tóraǵasy Si Tszinpindi Aq úide saltanatty qabyldaýmen qarsy aldy, dep habarlaidy dalanews.kz.
Bul – Si Tszinpinniń sońǵy on jyldan astam ýaqyt ishindegi AQSh-qa jasaǵan alǵashqy memlekettik sapary. Qytai basshysy jubaiy Pen Liiýanmen birge Amerika Qurama Shtattaryna úsh kúndik memlekettik saparmen keldi. Olardy Vashington mańyndaǵy Endriýs birikken áskeri-áýe bazasynda AQSh prezidenti Donald Tramp qarsy alǵan.
Qytaidyń memlekettik aqparat quraldary taratqan málimdemede Si Tszinpin Beijiń men Vashingtonnyń «básekeles emes, seriktes bolýy tiis» ekenin atap ótti.
«Qytai halqynyń uly jańǵyrýyna qol jetkizý jáne Amerikany qaitadan uly memleketke ainaldyrý umtylystary qatar júzege asa alady. Eki el bir-biriniń tabysyna yqpal etip, sonyń nátijesinde búkil álemge paida ákele alady», – dedi Qytai tóraǵasy.
Sondai-aq Si Tszinpin AQSh prezidentimen ekijaqty qarym-qatynastardyń mańyzdy máseleleri men jahandyq ahýal jóninde jan-jaqty pikir almasýdy kútetinin jetkizdi.
AQSh pen Qytai arasyndaǵy qarym-qatynasta saýda, jasandy intellektini damytý, Vashingtonnyń Iranǵa qatysty saiasaty jáne Taivan máselesi eń ózekti taqyryptardyń qatarynda qalyp otyr. Degenmen sarapshylar bul sapar naqty kelisimderden góri diplomatiialyq rásimder men simvolikalyq is-sharalarǵa kóbirek mán beretinin aityp otyr.
Óz kezeginde AQSh memlekettik hatshysy Marko Rýbio eki el arasyndaǵy joǵary deńgeidegi dialogtyń mańyzyn atap ótti. Onyń aitýynsha, AQSh pen Qytai – álemdegi eń iri eki ekonomika jáne eń qýatty áskeri kúshterdiń ieleri.
Sapar aiasynda Si Tszinpin men Donald Tramp Aq úidegi Ovaldy kabinette kelissóz júrgizedi. Sonymen qatar Aq úide memlekettik banket uiymdastyrylady. Úsh kúndik sapar juma kúni Aq úidegi shai rásimimen jáne AQSh-tyń Táýelsizdik deklaratsiiasy saqtalǵan Ulttyq arhivke barýmen aiaqtalady.
