[caption id="attachment_230057" align="alignright" width="296"]
Shımon Peres[/caption]
Peres: Siz qanshadasyz qazir? 63-te me? Meniń jasym 93-ke keldi. Aıtyńyzshy, aldaǵy 30 jylda ne tyndyrmaq oıyńyz bar? Ne úshin kúresip júrsiz ózi? Amerıkanyń qytyǵyna tıem dep oılaısyz ba?
Pýtın: Joǵa...
Peres: Amerıka Reseıdi basyp alǵysy kele me?
Pýtın: Óı, joǵa...
Peres: Álde Obamamen uǵysa almaı júrsińder me?
Pýtın: Onda sizdiń ne sharýań...Keshirińiz, muny nege suradyńyz?
Peres: Vladımır, men tyńshy emespin, qoryqpa. Menimen ashyq áńgimelesýge bolady.
Pýtın: Al ózińiz ne oılaısyz?
Peres: Ól, tiril - báribir Amerıka jeńedi.
Pýtın: Nege, oıbaı?!
Peres: Sebebi, olar baqytty. Al sizder baqytsyzsyzdar...
Dos izdeńiz, dos...
[caption id="attachment_230056" align="aligncenter" width="346"]
Vladımır Pýtın[/caption]
Marqum Peres munymen toqtamaǵan eken. Pýtınniń mysyn basý úshin ári qaraı bylaı degen.
Peres: Pýtınge, birinshiden, bylaı dedim. Amerıkalyq azanda oıanǵanda ne kóredi, bilesiz be? Ońtústiginde Meksıka tur. Olar óz jerinde júrgen meksıkalyqtardy qýyp, qýdalap jatqan joq. Soltústiginde Kanada tur. AQSH pen Kanada arasynan qyl ótpes dos. Oń men soly - teńiz, muhıt. Obama nege alańdaýy kerek?
Al sizder de? Sizder tańerteń oıanǵanda ne kóresizder? Japonıa, Qytaı, Aýǵanstandy ma? Qudaı-aý. Olar sizderde ulan-ǵaıyr jerdiń bar ekenin biledi, árıne. Biledi, ókinedi. Barmaq tisteıdi. Osynshama alyp aýmaq bos jatyr. Igerilmeı. İrip-shirip. Biraq, sizder olardy jaý kóresizder. Sondyqtan olarǵa baqyr tıyn ustatpaısyzdar. Álemdegi tushshy sýdyń 20 paıyzy sizderde. Biraq, taǵy da bóliskilerińiz kelmeıdi. Al Sibirdegi qar erigen kezde, birinshi kóretinderińiz – qytaılar. Bilesiz be, qazirgi Reseıdiń shyǵysyndaǵy qytaıdyń sany orystan kóp. Pýtın myrza...
Pýtınge ekinshiden bylaı dedim:
Amerıkada jer aýmaǵy men halyq sany úılesim tapqan. Al sizderde qalaı? 20 mıllıon sharshy shaqyrym jer... bos jatyr. Sizderde osynshama aýmaqqa ornalastyratyn halyq joq. Atymen joq. Ósimge qaraǵanda, ólim kóp. Ózińizdi maqtap, madaqtaǵanǵa semirmeńiz. Olar sizdi keshirmeıdi. Aıtyńyzshy, orys nege orta eseppen 62 jyl ómir súredi. Al amerıkalyqtardyń ómir súrý uzaqtyǵy 82 jastan tómen emes. Nege, bilesiz be?
Osy sátte men oǵan bylaı dedim:
"Siz ózińizdi patsha sanaısyz ǵoı, ıá?" Ol úndegen joq.
Iá, patsha sanaısyz. Al patshalar ne bitirdi? Olar eki qala saldy. Biri - Sankt-Peterbýrg, ekinshisi - Máskeý. Sizder bul qalalardy ánsheıin tamashalaý úshin saldyńyzdar. Ózińizge kerektini sizder tek osy aradan tabasyzdar. Al ózge Reseı she? Ondaǵy jaǵdaı qalaı? Muny sizge men aıtaıyn. Ózge Reseı Nıgerıa sıaqty. Qaıyrshy. Ózge Reseıdi qar basqan. Siz basqaratyn eldiń turǵyndary ómirdiń qyzyǵyn kórmeı ótip jatyr. Siz olarǵa laıyqty ómir súrýge múmkindik bermeı otyrsyz. Olar muny keshirmeıdi.
"Al Amerıka nesimen artyq? Reseıden nesimen artyq?" dep suradym men odan. Taǵy da úndegen joq. Óz saýalyma ózim jaýap berdim.
Olar jaqsylyq jasaıdy. Olar adamdarǵa ómir súrýge, ómirdiń qyzyǵyn kórýge múmkindik beredi.
Olar jaý emes, dos izdeıdi, dos... Bile-bilseńiz, Pýtın myrza, bul eń tıimdi ınvestısıa.
Reseıden ımperıa jasaýǵa umtylmańyz. Utylasyz. Mysal kerek pe? Eýropaǵa qarańyz. Fransıaǵa, Anglıaǵa, Portýgalıaǵa...Bári de ımperıa atanǵysy keldi. Aqyry ne boldy? Abyroıy tógildi. Álemdik muhıtty bılegisi kelgen Anglıany ashýǵa mingen úndister elinen qýyp shyqty. Qazir qolynda qalǵany - úsh aral ǵana. Olardy da qaıterin, qaıda jibererin bilmeı otyr.
Pýtın únsiz tyńdady. Oılandy dep oılaımyn. Áı, biraq...
"Jaý izdeý, jaý ataný, jaýgershilik jasaý ómirdegi eń úlken ókinish. Tragedıa. Siz aqymaq iske kóp aqsha tógip jatyrsyz..." - dedim men oǵan.
Derekkóz: kaz.365info.kz
