Qazaqstanda aliýminii, mys jáne myryshty ishki naryqta óńdeýdi arttyrýǵa baǵyttalǵan memlekettik qoldaý sharalary iske asyrylýda, dep habarlaidy Dala News.
Ónerkásip jáne qurylys ministrliginiń málimetinshe, bul sharalar Prezident Qasym-Jomart Toqaevtyń shikizatty tereń óńdeýdi damytý jáne óńdeý ónerkásibiniń úlesin arttyrý jónindegi tapsyrmalaryn oryndaý aiasynda júzege asyrylyp jatyr.
Baǵdarlamaǵa sáikes, iri taý-ken kompaniialary aldymen otandyq kásiporyndardy shikizatpen qamtamasyz etedi, al ishki naryqtaǵy mindettemeler oryndalǵannan keiin ǵana qalǵan kólem eksportqa jiberiledi.
Memlekettik qoldaý tetigi aiasynda bazalyq metaldar — aliýminii, mys jáne myrysh otandyq kásiporyndarǵa jeńildikpen usynylady. Jeńildik mólsheri ónimdi óńdeý deńgeiine bailanysty belgilengen:
•daiyn ónim úshin – London metaldar birjasy (LME) baǵasynan 5%;
•aralyq ónim úshin – 1%.
2025 jyly osy baǵdarlama aiasynda 18 kásiporynmen úshjaqty kelisim jasalyp, katodtyq mys, bastapqy aliýminii jáne metall myrysh jetkizý týraly kelisimder bekitildi.
Óńdeý ónerkásibinde shikizatqa suranys turaqty ósip keledi. Máselen:
•mysqa suranys 2025 jyly 18,6 myń tonna bolsa, 2026 jyly 20,4 myń tonnaǵa deiin ósedi;
•aliýminiidi ishki óńdeý kólemi 57,4 myń tonnany qurady, al 2026 jyly suranys 77,7 myń tonnaǵa jetýi múmkin;
•myryshqa qajettilik 2025 jylǵy 1,8 myń tonnadan 2,6 myń tonnaǵa deiin ulǵaiady.
Ministrlik málimetinshe, bazalyq metaldarmen qamtamasyz etý kabel ónimderi, akkýmýliatorlar, tereze profilderi, jihaz fýrnitýrasy jáne basqa da daiyn ónim óndirisin damytýǵa múmkindik beredi.
Osylaisha memleket shikizatty ishki óńdeýdi keńeitip, qosylǵan quny joǵary ónim óndirisin arttyrýdy jáne eksporttyq áleýetti kúsheitýdi kózdep otyr.
