ShQO. "Taldyqorǵan – Qalbataý – Óskemen" baǵytyndaǵy jańa jol paidalanýǵa beriledi
Aǵymdaǵy jyly "Nurly jol" memlekettik baǵdarlamasy aiasynda jalpy uzyndyǵy 869 shaqyrym bolatyn Shyǵys Qazaqstannyń "Taldyqorǵan – Qalbataý – Óskemen" jáne "Qalbataý – Maiqapshaǵai" eki mańyzdy kólik dálizin qaita qurý jalǵasýda. Asylbek Nuǵmanovtyń aitýynsha, búgingi tańda jobalar boiynsha 490 shaqyrym asfalt-beton jabyny, 600 shaqyrym joldyń negizi qalanyp, úsh kólik airyǵy, 19 kópir, 375 sý ótkizý qubyry salyndy.
– Qaýipsiz júrip ótýdi qamtamasyz etý boiynsha jumystardyń aiaqtalýyna qarai, atap aitqanda jol jiekterin tógý, belgilerdi ornatý, jol tańbalaryn salý, avtokólik qozǵalysy negizgi jol boiynsha uiymdastyrylady. Jyl sońyna deiin "Taldyqorǵan – Qalbataý – Óskemen" baǵytynda jańa jol ashý josparlanýda. "Qalbataý-Maiqapshaǵai" baǵyty boiynsha qozǵalysty qiyrshyq tas negiziniń joǵarǵy jaǵynan ashý josparlanýda. Odan ári Aqsýat aýylyna burylystan "Maiqapshaǵai" ótkizý pýnktine deiingi ýchaskede qozǵalys jańa jabyn boiynsha bolady, – dep habarlady Asylbek Nuǵmanov.
Jalpy, qaita jańartýdy 2022 jyly tolyq aiaqtaý josparlanyp otyr.
Spikerdiń aitýynsha, biyl respýblikalyq mańyzy bar "Taskesken – Baqty" avtomobil jolynyń uzyndyǵy 20 shaqyrym ýchaskesin qaita jóndeý aiaqtalyp, paidalanýǵa berildi. Sondai-aq, rekonstrýktsiialaý aiasynda búgingi kúni "QazAvtoJol" filialy jalpy uzyndyǵy 100 shaqyrym bolatyn "Óskemen – Semei" avtomobil jolynyń ýchaskelerin jobalaýdy júrgizýde.
Katonqaraǵai aýdanyndaǵy Berel aýyly men "Rahman qainary" shipajaiy arasyndaǵy tórt kópirdi kúrdeli jóndeýdiń jobalyq-smetalyq qujattamasyna túzetý jumystary bastaldy. Jobany iske asyrý 2022 jylǵa josparlanǵan.
Aǵymdaǵy jáne kelesi jylǵa respýblikalyq mańyzy bar 185 shaqyrym avtojolǵa, atap aitqanda "Semei – Qainar", "Qaraǵandy – Aiagóz – Tarbaǵatai – Buǵaz", "Omby – Maiqapshaǵai – Qaljyr – Marqakól", "Óskemen – Altai – Rahman qainarlary" baǵyttary boiynsha ortasha jóndeý júrgizý josparda bar. Aǵymdaǵy jyly Aiagoz jáne Tarbaǵatai aýdandary arasyndaǵy uzyndyǵy 56 shaqyrym ýchaskeni asfalttaý jumystary bastaldy.
Asylbek Nuǵmanov baspasóz konferentsiiasy barysynda Osinov asýyn ainalyp ótip, ýchaskeni qaita qurý boiynsha jumystardyń barysyna túsinikteme berdi.
- Joldyń bir bóligi orman qory aýmaǵy arqyly ótkendikten, bul jerlerdi avtomobil joldary komitetiniń menshigine shyǵarý jumystary júrgizildi. Búgingi tańda bul protsedýra aiaqtaldy, JSQ túzetildi. Qujattama Qarjy ministrliginiń qaraýynda. Biýdjet qarajaty kelesi jyly bólinedi dep kútemiz, – dep túsindirdi spiker.
