Jobanyń biregeiligi, sóileý qabileti kesh damyǵan 5-6 jastaǵy balalar, neirotiptik balalarmen birge inkliýzivti túrde, dárigerlerdiń usynystary eskerile otyryp oqytylady, dep habarlaidy Dalanews.kz Altaynews-ke silteme jasap.
Inkliýzivti bastaýysh mekteptiń ashylýy 15 qazanǵa josparlanǵan. Mektepti S. Amanjolov atyndaǵy ShQÝ ashyp otyr.
"Inkliýzivti bilim berý maqsatynda elimizdiń 16 pedagogikalyq bilim beretin joǵary oqý ornyna inkliýzivti bilimdi damytýǵa ministrlikten arnaiy qarajat bólindi. Synyptaǵy barlyq jumys materialdarynyń sapasy joǵary ekenin kórip otyrmyz. Biz erekshe balalarymyzǵa sapaly bilim berýde qarjymyzdy aiamadyq", - dedi QR Ǵylym jáne joǵary bilim ministri Saiasat Nurbek.
Sonymen qatar, Ministr aldaǵy ýaqytta ýniversitetterdiń janynda inkliýzivti balabaqshalar ashýdy jáne bul baǵyttaǵy jumystardy áli de damytylatynyn atap ótti.
Jańa inkliýzivti bastaýysh mektebinde oqýshylarǵa stýdentter men magistranttar ustazdyq etip, negizgi jáne qosymsha sabaqtar ótkizetin bolady. Sabaqtar ata-analardyń tańdaýy boiynsha: logika, logopediia, sensorlyq-sporttyq sektsiialar, dizain, robototehnika, tilderdi úirený jáne t. b. pándermen tolyqpaq.
"Inkliýzivti bilim mektebinde oqý - balanyń intellektýaldy, áleýmettik jáne emotsionaldy jetilýine kómektesedi. Bul ári qarai onyń damý men sapaly ómir súrýine negiz bolmaq. Biz balanyń aqyl-oiyn belsendi shyǵarmashylyq áreketke itermelep, jaǵymdy orta qurýǵa jáne turaqty psihologiialyq tekserýge nazar aýdaramyz. Al balanyń damý dinamikasy onyń bastapqy jáne qorytyndy diagnostika derekteriniń salystyrylýymen anyqtalady", - dedi Psihologiia jáne túzetý pedagogikasy kafedrasynyń qaýymdastyrylǵan professory Svetlana Stelmah.
Mektep partalary men oryndyqtarynyń negizgi kriteriileri — qaýipsizdik jáne kópfýnktsionaldylyq.
Sondyqtan inkliýzivti oqytýǵa arnalǵan jabdyqtar men jihazdar ýniversitettiń "Shygys Bastau" óndiristik tsehynda daiyndaldy.
Sonymen qatar, mektepte kedergisiz orta, sapaly ádistemelik súiemeldeý qarastyrylǵan.
