Búgin Óskemen qalasynda D.Serikbaev atyndaǵy Shyǵys Qazaqstan tehnikalyq ýniversitetiniń bazasynda alǵashqy óńirlik ǵylym keńesi ótti, – dep habarlaidy Dalanews.kz ShQO ákiminiń baspasóz qyzmetine silteme jasap.
Keńestiń basty maqsaty – ǵylym men qoǵam arasyndaǵy bailanysty nyǵaitý, Shyǵys Qazaqstan oblysynyń ǵylymi-tehnikalyq áleýetin arttyrý. Keńes oblys ákimdigi men tehnikalyq ýniversitettiń tikelei yntymaqtastyǵy arqyly quryldy.
Qazirgi tańda óńirde birqatar ǵylymi jobalar júzege asyrylyp jatyr, Shyǵys Qazaqstan ǵalymdarynyń kóptegen jańalyqtary óndiriste qoldanylýda. Sol sebepti qazirgi ýaqytta ǵylymi orta men óndiris arasyndaǵy bailanysty qoldap otyrý óte mańyzdy, bul ǵylymi ideialar men jobalardyń ómirde júzege asýyna septigin tigizedi.
– Keńes bilik, ǵylym jáne biznes arasyndaǵy dialog alańyna ainalady. Eger bizdiń ǵalymdar men óndiris salasynyń ókilderi birlese jumys isteitin bolsa, ǵylymi ideialardy tájiribege engizip, óndiriste jańa jetistikterge qol jetkizýge bolady degen senim bar, – dedi oblys ákimi Nurymbet Saqtaǵanov.
Keńes óńirlik máseleler men mindetterdi eskere otyryp, ǵylymdy damytýdyń basym baǵyttaryn aiqyndaýǵa strategiialyq fýnktsiia atqarady, ǵylymi qyzmette praktikalyq baǵytty kúsheitýge yqpal etedi. Sonymen qatar, otyrystar barysynda qatysýshylar qosymsha qarjylandyrýdy nemese vedomstvoaralyq kelisimdi qajet etetin bastamalar, ǵylymi jobalar men baǵdarlamalardy talqylaýǵa shyǵara alady.
Shyǵys Qazaqstan oblysyndaǵy alǵashqy óńirlik ǵylym keńesiniń aiasynda D.Serikbaev atyndaǵy Shyǵys Qazaqstan tehnikalyq ýniversitetinde «Qorǵanysh jáne fýnktsionaldyq qaptamalar» jastar ǵylym ortalyǵynyń ashylýy ótti.
