Birinshi. Sońǵy ýaqyttar Pýtinge eń jaqyn 5-6 adamnyń qatarynda sanalatyn Qorǵanys ministri Sergei Shoigýdyń eki aptadan beri kórinbeýin sarapshylar san saqqa joryp jatyr. «Agentstvo» saity biliktegi derekkózge súienip onyń júregi aýyryp jatqanyn habarlady. Al AQSh Qorǵanys ministrligi 12 kúnnen beri Shoigýǵa zvandap ala almai jatyrmyz dep málimdedi.
Resei Qaýipsizdik Keńesiniń videokonferentsiia formatynda ótken sońǵy otyrysy kúdikti kúsheite tústi. Ekranda Shoigýdyń videosy túsiniksiz jypylyqtap ketti. Ári onyń kiimi de burynǵyǵa uqsas bop shyqty.
Osyǵan bailanysty, Ýkrainadaǵy soǵystyń sátsiz júrýine basty kináli nemese áskeri tóńkeris jasaýy múmkin adam retinde Pýtin óziniń eń jaqyn serigin oqshaýlap qoidy degen joramal aityla bastady.
Ekinshi. Reseilik OMON-nyń 12 qyzmetkeri Ýkrainaǵa barýdan bas tartty. Olar: «Bizdiń sheteldik pasportymyz joq, sondyqtan ózge eldiń territoriiasyna ótýimiz zańǵa qaishy» depti. Nátijesinde kapitan Farid Chitav bastaǵan rosgvardiiashylar jumystan qýylǵan. Endi olar sotqa júginbek.
Buǵan deiin Resei politsiia bólimderiniń Ýkrainaǵa soǵysqa jiberilgeni týraly birneshe derek jariialanǵan bolatyn. Mysaly, sheshenderdiń «qadyrovshylar» dep atalatyn polky Rossgvardiia arqyly Ishki ister ministrligine qaraidy.
Úshinshi. NATO kúshteriniń burynǵy qolbasshysy Ýesli Klark Resei Polshaǵa taktikalyq iadrolyq bomba tastaýy múmkin degen pikir aitty. Pýtin buǵan Ýkrainaǵa NATO kómektesip jatyr degen máseleni jeleý etýi múmkin.
«Al iadrolyq soǵystan qoryqqan NATO bul shabýylǵa jaýap bermei keiin sheginedi» deidi otstavkadaǵy amerikan generaly.
Bir ai buryn sarapshylardyń kóbi Pýtin Ýkrainaǵa soǵys ashpaidy degen bolatyn. Al búgin «Pýtin iadrolyq qarý qoldanbaidy» dep kim senimdi aita alady?
