ءبىرىنشى. سوڭعى ۋاقىتتار پۋتينگە ەڭ جاقىن 5-6 ادامنىڭ قاتارىندا سانالاتىن قورعانىس ءمينيسترى سەرگەي شويگۋدىڭ ەكى اپتادان بەرى كورىنبەۋىن ساراپشىلار سان ساققا جورىپ جاتىر. «اگەنتستۆو» سايتى بيلىكتەگى دەرەككوزگە سۇيەنىپ ونىڭ جۇرەگى اۋىرىپ جاتقانىن حابارلادى. ال اقش قورعانىس مينيسترلىگى 12 كۇننەن بەرى شويگۋعا زۆانداپ الا الماي جاتىرمىز دەپ مالىمدەدى.
رەسەي قاۋىپسىزدىك كەڭەسىنىڭ ۆيدەوكونفەرەنسيا فورماتىندا وتكەن سوڭعى وتىرىسى كۇدىكتى كۇشەيتە ءتۇستى. ەكراندا شويگۋدىڭ ۆيدەوسى تۇسىنىكسىز جىپىلىقتاپ كەتتى. ءارى ونىڭ كيىمى دە بۇرىنعىعا ۇقساس بوپ شىقتى.
وسىعان بايلانىستى، ۋكرايناداعى سوعىستىڭ ءساتسىز جۇرۋىنە باستى كىنالى نەمەسە اسكەري توڭكەرىس جاساۋى مۇمكىن ادام رەتىندە پۋتين ءوزىنىڭ ەڭ جاقىن سەرىگىن وقشاۋلاپ قويدى دەگەن جورامال ايتىلا باستادى.
ەكىنشى. رەسەيلىك ومون-نىڭ 12 قىزمەتكەرى ۋكرايناعا بارۋدان باس تارتتى. ولار: «ءبىزدىڭ شەتەلدىك پاسپورتىمىز جوق، سوندىقتان وزگە ەلدىڭ تەرريتورياسىنا ءوتۋىمىز زاڭعا قايشى» دەپتى. ناتيجەسىندە كاپيتان فاريد چيتاۆ باستاعان روسگۆاردياشىلار جۇمىستان قۋىلعان. ەندى ولار سوتقا جۇگىنبەك.
بۇعان دەيىن رەسەي پوليسيا بولىمدەرىنىڭ ۋكرايناعا سوعىسقا جىبەرىلگەنى تۋرالى بىرنەشە دەرەك جاريالانعان بولاتىن. مىسالى، شەشەندەردىڭ «قادىروۆشىلار» دەپ اتالاتىن پولكى روسسگۆارديا ارقىلى ىشكى ىستەر مينيسترلىگىنە قارايدى.
ءۇشىنشى. ناتو كۇشتەرىنىڭ بۇرىنعى قولباسشىسى ۋەسلي كلارك رەسەي پولشاعا تاكتيكالىق يادرولىق بومبا تاستاۋى مۇمكىن دەگەن پىكىر ايتتى. پۋتين بۇعان ۋكرايناعا ناتو كومەكتەسىپ جاتىر دەگەن ماسەلەنى جەلەۋ ەتۋى مۇمكىن.
«ال يادرولىق سوعىستان قورىققان ناتو بۇل شابۋىلعا جاۋاپ بەرمەي كەيىن شەگىنەدى» دەيدى وتستاۆكاداعى امەريكان گەنەرالى.
ءبىر اي بۇرىن ساراپشىلاردىڭ كوبى پۋتين ۋكرايناعا سوعىس اشپايدى دەگەن بولاتىن. ال بۇگىن «پۋتين يادرولىق قارۋ قولدانبايدى» دەپ كىم سەنىمدى ايتا الادى؟
