«Bul – óte kúrdeli apat. Bir qalany túgel alyp shyǵý degen ońaı sharýa emes. Aınalaıyn, halqym, biz sizderdiń bastaryńyzdaǵy aýyrtpashylyqty túsinemiz. Biz el bolyp, jurt bolyp osy qıyndyqty kóteremiz. Qazir úlken de, kishi de Arysqa alańdap otyr. Biz qıyn jaǵdaıdan shyǵyp kele jatyrmyz. Óz-ózimizdiń abyroıymyzdy túsirmeıik. Arystaǵy qarý-jaraq qoımasy túgel joıylady. Budan bylaı Arysta mundaı jaǵdaı eshqashan bolmaıdy», – dedi Ómirzaq Shókeev.
«Basymmen jaýap beremin!» Ómirzaq Shókeev Arysta radıasıa joq ekenin tilge tıek etkende osylaı dedi.
«Aramyzda arandatýshylar bar, solar jalǵan sóz taratyp júr. Arysta radıasıa joq, men buǵan basymmen jaýap beremin!», – dedi ol.
Oblys ákiminiń aıtýynsha, áskerı qyzmetkerler aýlalardy, kóshelerdi, qoǵamdyq oryndardy tekserip, jarylmaǵan snarádtardy jınap jatyr.
«Bul jerdiń barlyǵy qaýipti. Dál qazir barýǵa bolmaıdy. Men áskerı qyzmetkerlerdi asyqtyryp jatyrmyn. Olar kún demeı, tún demeı jumys istep jatyr.
Keshe bir kúnde 5 myńnan astam jarylǵysh zat tabyldy. Túsinip tursyzdar ma, áskerı qyzmetkerlerge úılerge, aýlalarǵa kirý kerek. Biraq zań bar. Zańǵa qaıshy kelmeý úshin oblys prokýrory jekemenshik úılerge kirýge ruqsat berdi. Áskerı qyzmetkerler turǵyndardyń qaýipsizdigi úshin úılerge kirýge mindetti. Sondyqtan sizderden de úılerińizge kirýge ruqsat suraımyz», – dedi Ómirzaq Shókeev.
Áskerı qyzmetkerler qaýipsizdikke tolyq kepildik bergen kezde Arys turǵyndary qalaǵa birinshi bolyp kiretinin baıandaǵan Ómirzaq Shókeev:
«Qalaǵa belgilengen tártippen kiremiz. Áskerı qyzmetkerler qalaǵa kirýge saǵat altyda ruqsat beremiz dese, biz saǵat tórtte jınalyp, barlyǵymyz uıymdasqan túrde, avtobýspen baramyz. Qalaǵa kirgen kezde ár adamǵa qaýipsizdikke qatysty jadynama beremiz.
Sizderdi saper, ákimdik qyzmetkeri jáne ýchaskelik polısıa qarsy alady. Olar úılerińizge sizdermen birge kiredi. Úıdiń ishin, syrtyn sýretke, vıdeoǵa túsirip, qaýipsizdikke kóz jetkizedi. Hattama toltyrady. Sizder oǵan qol qoıasyzdar. Hattama toltyrylǵannan keıin keltirilgen shyǵyn anyqtalady. Keıin sol úıge jóndeý jumysy júrgiziledi», – dedi oblys ákimi.
Ómirzaq Shókeevtiń málimdeýinshe, Arys 17 sektorǵa bólingen. Ár sektorda 400-450 úı bar. Ol úılerge Prezıdenttiń tapsyrmasymen 17 oblystan qurylys mamandarynan quralǵan mamandar keledi. Olar palatkada jatyp, jumys isteıdi. Qala bir aıda qalpyna keltiriledi.
«Men kúnde sizdermen birge bolamyn. Bir aı osy jerde turamyn. Barlyǵy aıaqtalǵansha sizdermen júremin. Arandatýshylardyń sózine senbeńizder, biz elmiz ǵoı, eldigimizdi tanytaıyq.
Aınalaıyn halqym, sizder jalǵyz emessizder, barlyǵy kómektesip jatyr, sabyr saqtaıyq. Aınalaıyn, halqym, berekemizdi buzbaıyq. Ári ketse bir-eki kúnde qalaǵa kiresizder.
Snarád jarylmaıdy, onyń 70 paıyzy jarylyp bitti. Qalǵan qarý-jaraqtyń barlyǵyn alyp ketedi. Qarý-jaraq qoımasy túgel joıylady. Saperlar kezekshilikte bolady. Kúdikti nárse kórseńizder, birden 112 degen nomerge habarlaý kerek», – dep qorytty sózin oblys ákimi.
Origin: inbusiness.kz
https://www.facebook.com/100005107905833/videos/1256601624520089/
https://www.facebook.com/100011352248720/videos/1035183466870052/
