Prokýrorlar sot jaryssózinde kúdiktilerdi qansha jylǵa sottaýdy talap etkeni belgili boldy, dep habarlaidy Dalanews.kz.
Aiyptaý tarapy Sherzat Polatty óltirý isi boiynsha aiyptalýshylarǵa kelesi jaza merzimderin surady:
Abzal Shynasylǵa – QR QK 99-baby 2-bóligi (kisi óltirý), 293-baby 3-bóligi (buzaqylyq), 24-baby 3-bóligi (qylmysqa daiyndalý jáne oǵan oqtalý) boiynsha 23 jyl bas bostandyǵynan aiyrý;
Ravil Sakievke – 293-baptyń 3-bóligi (buzaqylyq), 99-baptyń 2-bóligi, 24-baptyń 3-bóligi (kisi óltirýge oqtalý) boiynsha 20 jyl;
Shyńǵys Belǵojaevqa – 293-baptyń 3-bóligi boiynsha 7 jyl;
Darhan Askentaiǵa – 293-baptyń 3-bóligi boiynsha 7 jyl;
Nurkiias Iliiasovqa – 293-baptyń 3-bóligi boiynsha 9 jyl;
Nurbol Toqtaýbaevqa – 293-baptyń 3-bóligi boiynsha 7 jyl;
Azamat Toqtaýbaevqa – 293-baptyń 3-bóligi (buzaqylyq), qosymsha 188-bap (urlyq) boiynsha 15 jyl;
Didar Qaliahmetke – 293-baptyń 3-bóligi boiynsha 7 jyl;
Didar Ysqaqqa (kámeletke tolmaǵan) – 434-bap (aýyr qylmys týraly habarlamaý) boiynsha 1 jyl 6 ai bas bostandyǵynan aiyrý.
Buǵan deiin memlekettik aiyptaýshy Dana Sársenbai sotta sóilegen sózinde Sherzatqa pyshaq salǵan Shynasyl ekeni tolyqtai dáleldengenin aitqan edi.
Onyń ishinde kúdikti retinde bergen jaýabynda «Sherzatqa pyshaq suǵyp aldym» degen sózi bar ekenin eske saldy.
Sot otyrysy barysynda qorǵaý quqyǵy bar Jaqsykeldiniń jáne sottalýshylardyń biri Abzaldyń tóbelesten keiin pyshaǵyn jýyp jatqanyn aitqan. Bul – istegi mańyzdy epizodtardyń biri retinde tirkeldi.
Saraptama nátijesine súiensek, Sherzattyń sol jaq ókpesiniń joǵarǵy bóligindegi jaraqat onyń ólimine sebep bolǵan jáne ol densaýlyqqa aýyr ziian keltiretin jaraqat retinde baǵalanǵan.
Prokýror sarapshy Halimnazarovtyń qorytyndysyn keltirip, jaraqattyń tereńdigi 12 sm bolǵanyn, al Shynasyldan alynǵan pyshaqtyń júzi 9,5 sm ekenin aitty. Sarapshynyń pikirinshe, adamnyń terisi serpimdi bolǵandyqtan, pyshaq sabynyń túbine deiin kirip ketken. Bul – pyshaqtyń úlken kúshpen salynǵanyn kórsetedi.
Dana Sársenbai Shynasyldyń sotty shatastyrý úshin ártúrli jaýap bergenin atap ótip, onyń sózine senýge bolmaitynyn jetkizdi. Prokýrordyń aitýynsha, Sherzatqa pyshaq salǵan naqty tulǵa – Shynasyl Abzal ekeni tolyq dáleldengen. Bul jaitty eki birdei sarapshy da rastaǵan.
