Qazaqstandaǵy eń iri kásipkerlerdiń biri Serikjan Seiitjanovqa tiesili Shymkent qalasyndaǵy sport saraiy (qazirgi Muz saraiy) memleketke qaitaryldy, dep habarlaidy Dalanews.kz.
Bul Shymkent qalasynyń prokýratýrasynyń talap aryzy boiynsha júzege asty.
2017 jyly Shymkent qalasynyń "Sport saraiy" JShS-niń 67,09% úlesi jekeshelendirilip, quny 1 mlrd teńgege, iaǵni naryqtyq qunynan 8 ese az somaǵa satylǵany anyqtaldy.
"Sonymen qatar Sport saraiyn satyp alǵan uiym jekeshelendirý rásimine zańsyz jiberilgen jáne jarǵylyq qujattarǵa sáikes sport salasyndaǵy qyzmettermen ainalysýǵa quqyǵy joq bolǵandyqtan, aýktsionǵa qatysýshy retinde tirkelýge jatpaidy. Sport saraiy ońtústik óńirlerde qysqy sport túrlerin daiyndaityn jalǵyz oryn bolyp sanalady", - delingen málimette.
Prokýratýra obektini jekeshelendirý kezinde memleket múlkin qoǵam igiligine tiimdi paidalaný qaǵidasyna sáikes basqarýdy mindetteitin "Memlekettik múlik týraly" QR Zańynyń normalary buzylǵanyn alǵa tartty.
"Sondai-aq 5 jyl ishinde memleket sport saraiynyń úi-jailaryn jalǵa alýǵa 1 mlrd teńgeden astam qarjy jumsaǵan. Shymkent qalasynyń mamandandyrylǵan aýdanaralyq ekonomikalyq sotynyń 2024 jylǵy 27 mamyrdaǵy sheshimimen jekeshelendirý nátijeleri joiyldy", - dep qosty prokýratýra.
Aita keteiik, Serikjan Seiitjanov Forbes nusqasy boiynsha Qazaqstannyń eń yqpaldy 50 kásipkeriniń tiziminde tur.
Oligarhtyń otbasyna "Ońtústik" FTPK tiesili. Osy arqyly otbasy munai óndirýshi "Saýts Oil" JShS-niń 51%-yn, Smart-Oil burǵylaý kompaniiasyn, "Standart Tsement" zaýytyn, "KAS-beton" JShS, "Aq-jol TransServis", "Standart Resýrsis" kompaniialaryna ielik etedi.
Sondai-aq, otbasyǵa Rixos Khadisha Shymkent, Rixos Turkestan qonaq úileri, Satti Zhol JQS jelisi, Ońtústik Qazaqstan meditsina akademiiasy jáne Shymkenttegi Innovatsiialyq-tehnologiialyq kolledj tiesili. Kásipker – "Ońtústik" FTPK jáne "Saýts-Oil" prezidenti.
