Shymkent qalalyq otbasy, balalar jáne jastar isteri jónindegi basqarmasy tapsyrysy boiynsha «Space solutions» kompaniiasynyń uiymdastyrýymen joǵary jáne orta oqý oryndary stýdentter arasynda «Otbasy – januia jarasymy» atty seminar-treningter ótti.
Atalmysh sharaǵa «ABRIS» trening ortalyǵynyń direktory Mergenbai Aqan, «Resýrstyq inkliýzivti bilim berý jáne psihologiialyq kómek berý» ortalyǵynyń jetekshisi, art-terapevt, tájirbieli psiholog Aitjanova Gýlnara, «Stýdentterge psihologiialyq kómek kórsetý» ortalyǵynyń bas mamany Barova Aizat jáne JOO stýdentteri men BAQ ókilderi qatysty.
Is-sharanyń maqsaty bilikti mamandardyń óz tájirbielerimen bólise otyryp jastar arasynda otbasylyq qundylyqtaryn nasihattaý, jar tańdaý máselesinde aqyl-keńes berý, ajyrasý sekildi qoǵam keseliniń boldyrmaý joldaryn kórsetý boldy.
– Búgingi ótken seminar-treningte otbasy músheleriniń róli jaily paidaly keńester ala otyryp, bolashaqta qyz balaǵa turmysqa shyǵar aldynda «Áiel. Kelin. Ana» dep atalatyn mańyzdy shemaǵa daiyn bolý kerektigin túsindim. Mundai seminar-treningter jii ótetin bolsa biz sekildi árbir jas jaýapkershiligi mol turmystyq ómirge qadam basar aldynda kóptegen qajetti aqparattardan habardar bolar edi», – dedi seminar-trening qatysýshysy Aigerim Aqjol.
«Resýrstyq inkliýzivti bilim berý jáne psihologiialyq kómek berý» ortalyǵynyń jetekshisi, art-terapevt, tájirbieli psiholog Aitjanova Gýlnara otbasynda ata-ana men bala arasyndaǵy qarym-qatynas jaily, úlken, orta jáne kishi balanyń psihologiiasy, olardyń jeke atqaratyn róliniń mańyzdylyǵyn túsindirse, «ABRIS» trening ortalyǵynyń direktory Mergenbai Aqan jas otbasylarǵa ne sebepti ajyrasý qaýpi tónetindigi jáne sol kemshilikterdiń qalai aldyn alýǵa bolatyndyǵy jóninde aityp ótti.
