Ońtústik Qazaqstan oblysynan «Dostyq kerýeni» Ózbekstan Respýblıkasyna jolǵa shyqty. Bul issapar Ózbekstan Respýblıkasy Prezıdenti Shavkat Mırzıóevtiń naýryz aıynda Qazaqstanǵa jasaǵan resmı sapary kezinde Qazaqstan halqy Assambleıasy men Ózbekstan Respýblıkasy Internasıonaldyq mádenı ortalyǵynyń arasyndaǵy yntymaqtastyq týraly memorandým aıasynda iske asyrylyp otyr.
Memorandýmda qoǵamdyq-saıası, mádenı-bilim berý, ǵylymı jáne aqparattyq salalardaǵy yntymaqtastyq, eki el halyqtarynyń jaqyndasýyna, halyqtyq dıplomatıanyń nyǵaıýy men damýyna yqpal etetin birlesken jobalar men is-sharalardy ázirleý jáne iske asyrý josparlanǵan bolatyn.
«Qazaqstan halqy Assambleıasy» ǵımaraty aldynan jolǵa shyqqan kerýendi shyǵaryp salý rásiminde oblystyq «Qoǵamdyq kelisim» MKK basshysy Erbol Baıqonaqov, Túrkistan qalalyq aqsaqaldar alqasynyń tóraǵasy Jarylqasyn Áziretbergenov, oblystyq ózbek etnomádenı birlestiginiń tóraǵasy, oblystyq máslıhattyń depýtaty Badrıddın Nıshankýlov sóz sóılep, bul shara Elbasynyń «Bolashaqqa baǵdar: rýhanı jańǵyrý» atty maqalasyna qoldaý ári, eki baýyrlas elder arasyndaǵy dostyq qarym-qatynasty nyǵaıtý maqsatynda uıymdastyrylyp otyrǵanyn aıtty.
Ózbekstanǵa bet alǵan 50 aqsaqal 2-6 mamyr aralyǵynda Tashkenttegi Tóle bı babamyzdyń mazaratyna zıarat etip, ári qaraı Samarqandtaǵy Ámir Temir jáne Jalańtós bahadúrdiń, Buharadaǵy Bahaýddın Nakshbandıdiń kesenesimen tanyspaq.
Sonymen qatar, «Dostyq kerýeniniń» músheleri Ózbekstan Respýblıkasy Internasıonaldyq mádenı ortalyǵynda, Ózbekstandaǵy qazaq mádenı ortalyǵynda jáne ózge de tarıhı-mádenı ortalyqtarynda bolyp, sol eldiń azamattarymen kezdesýler josparlanýda.
