وڭتۇستىك قازاقستان وبلىسىنان «دوستىق كەرۋەنى» وزبەكستان رەسپۋبليكاسىنا جولعا شىقتى. بۇل ءىسساپار وزبەكستان رەسپۋبليكاسى پرەزيدەنتى شاۆكات ميرزيويەۆتىڭ ناۋرىز ايىندا قازاقستانعا جاساعان رەسمي ساپارى كەزىندە قازاقستان حالقى اسسامبلەياسى مەن وزبەكستان رەسپۋبليكاسى ينتەرناسيونالدىق مادەني ورتالىعىنىڭ اراسىنداعى ىنتىماقتاستىق تۋرالى مەموراندۋم اياسىندا ىسكە اسىرىلىپ وتىر.
مەموراندۋمدا قوعامدىق-ساياسي، مادەني-بىلىم بەرۋ، عىلىمي جانە اقپاراتتىق سالالارداعى ىنتىماقتاستىق، ەكى ەل حالىقتارىنىڭ جاقىنداسۋىنا، حالىقتىق ديپلوماتيانىڭ نىعايۋى مەن دامۋىنا ىقپال ەتەتىن بىرلەسكەن جوبالار مەن ءىس-شارالاردى ازىرلەۋ جانە ىسكە اسىرۋ جوسپارلانعان بولاتىن.
«قازاقستان حالقى اسسامبلەياسى» عيماراتى الدىنان جولعا شىققان كەرۋەندى شىعارىپ سالۋ راسىمىندە وبلىستىق «قوعامدىق كەلىسىم» مكك باسشىسى ەربول بايقوناقوۆ، تۇركىستان قالالىق اقساقالدار القاسىنىڭ ءتوراعاسى جارىلقاسىن ازىرەتبەرگەنوۆ، وبلىستىق وزبەك ەتنومادەني بىرلەستىگىنىڭ ءتوراعاسى، وبلىستىق ءماسليحاتتىڭ دەپۋتاتى بادريددين نيشانكۋلوۆ ءسوز سويلەپ، بۇل شارا ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىنا قولداۋ ءارى، ەكى باۋىرلاس ەلدەر اراسىنداعى دوستىق قارىم-قاتىناستى نىعايتۋ ماقساتىندا ۇيىمداستىرىلىپ وتىرعانىن ايتتى.
وزبەكستانعا بەت العان 50 اقساقال 2-6 مامىر ارالىعىندا تاشكەنتتەگى تولە بي بابامىزدىڭ مازاراتىنا زيارات ەتىپ، ءارى قاراي سامارقاندتاعى ءامىر تەمىر جانە ءجالاڭتوس ءباھادۇردىڭ، بۇحاراداعى باحاۋددين ناكشبانديدىڭ كەسەنەسىمەن تانىسپاق.
سونىمەن قاتار، «دوستىق كەرۋەنىنىڭ» مۇشەلەرى وزبەكستان رەسپۋبليكاسى ينتەرناسيونالدىق مادەني ورتالىعىندا، وزبەكستانداعى قازاق مادەني ورتالىعىندا جانە وزگە دە تاريحي-مادەني ورتالىقتارىندا بولىپ، سول ەلدىڭ ازاماتتارىمەن كەزدەسۋلەر جوسپارلانۋدا.
