Shymkentte qala ákiminiń orynbasary Rýslan Berdenovke jasalǵan qastandyq týraly is boiynsha sot otyrysy ótip jatyr. Sot otyrysynda aiyptalýshy sheneýnikten keshirim surady, dep habarlaidy Dalanews.kz.
Sot otyrysynda Jiembai jábirlenýshi Rýslan Berdenovten keshirim surady.
"Men ózimdi durys istedim dep aita almaimyn. Keshirim suraimyn. Óltirgim kelgen joq, ondai oiym bolmaǵan. Sizge tez saýyǵyp ketýdi tileimin. Ózim jeke baryp keshirim suraimyn", – dedi aiyptalýshy.
Al Rýslan Berdenov ádil jaza taǵaiyndalýynyń mańyzdylyǵyn atap ótti.
"Jábirlenýshi retinde meniń talap etetinim – kináli adamnyń zańǵa sáikes ádil jazaǵa tartylýy. Eger mundai banditizmge búgin tosqaýyl qoimasaq, ol memlekettik qyzmettiń abyroiyna nuqsan keltiredi. Bul oq tek maǵan emes, jalpy memlekettik qyzmette júrgen árbir adamǵa qarsy baǵyttalǵan", – dedi ol sýdiaǵa.
