Búgin bul týraly OQO óńirlik komýnıkasıalar qyzmetinde ótken brıfıńte oblystyq tabıǵı resýrstar jáne tabıǵat paıdalanýdy retteý basqarmasynyń basshysy Ilás Quramysov málim etti.
Aıta keterligi, óńirde 2017-2021 jyldarǵa arnalǵan «Shatqal» is-shara jospary bekitilgen. Josparlanǵan bes jyl merzim ishinde oblysta 37 myń gektar jerge 15 mln. túp túrli aǵash kóshetteri otyrǵyzylatyn bolady.
– «Shatqal» jobasy qajetti kóshetter orman sharýashylyǵy mekemelerindegi tuqymbaqtary esebinen qamtamasyz etilip otyr. 2017 jyly osy tuqymbaqtardan aýdan, qala ákimdikterine 480 myń dana kóshet berilse, aǵymdaǵy jyly 2 mln.-ǵa jýyq túp kóshet alynatyn bolady, – dedi Ilás Shoıbekuly.
Basqarma basshysynyń aıtýynsha, orman jerinde meken etetin janýarlar dúnıesin qorǵaý boıynsha kúzet qyzmetkerlerimen birqatar is-sharalar atqarylǵan. 2017 jyly 800-deı reıdtik is-shara uıymdastyrylyp, 340 zań buzýshylyq faktileri anyqtalǵan. Nátıjesinde 3,2 mln. teńgege ákimshilik aıyppul salynyp, búgingi tańda onyń 2,7 mln.teńgesi óndirildi. Sondaı-aq, oblysta janýarlar dúnıesin saqtap qalý jáne ósimin molaıtý maqsatynda 2017 jyly jańadan 5 tuqymbaq qurylǵan. Búgingi kúni ań-qustardy alyp kelý jumystary júrgizilýde. Mundaı sharalar respýblıka boıynsha tek Ońtústik Qazaqstan oblysynda ǵana iske asyrylyp otyr.
Sonymen qatar, oblystyq tabıǵı resýrstar jáne tabıǵat paıdalanýdy retteý basqarmasy orman alqaptaryndaǵy órt qaýipsizdigi erejesi talaptaryn saqtaý jóninde úgit-nasıhat jumystaryn turaqty túrde júrgizip keledi. Jylda orman sharýashylyǵy men tótenshe jaǵdaılar departamenti qyzmetkerleriniń qatysýymen taktıkalyq oqý-jattyǵýlar ótkiziledi.
OQO ákiminiń baspasóz qyzmeti
https://dalanews.kz/33260
