Shymkent qalasy politsiia departamentiniń kiberqylmysqa qarsy is-qimyl basqarmasy stýdentterdi nysanaǵa alǵan alaiaqtyq shemanyń jolyn kesti, dep habarlaidy Dala news.
Tergeý málimetinshe, eki kúdikti 2025 jyldyń qazan aiynan bastap TikTok áleýmettik jelisi arqyly shymkenttik joǵary oqý oryndarynyń stýdentterin anyqtap otyrǵan. Arnaiy bottardyń kómegimen olar paidalanýshylardyń uialy telefon nómirleri men anketalyq derekterin alǵan.
Keiin kúdiktiler oqý ornynyń portalyn paidalanyp, stýdentterdiń úlgerimin teksergen. Keibirinde synaqtan tómen ball baryn anyqtaǵan soń, belsendi áreketke kóshken.
Alaiaqtar messendjer arqyly jalǵan nómirlerden habarlasyp, ózderin ýniversitet qyzmetkeri retinde tanystyrǵan. Stýdentterge «bir ball jetpei tur», «akademiialyq qaryz týyndaidy» degen jalǵan aqparat berip, máseleni «sheship berýdi» jáne baǵany «túzetýdi» usynǵan.
Qyzmeti úshin ár stýdentten 70–80 myń teńge talap etken. Aqsha alǵannan keiin bailanysqa shyqpai qoiǵan. Qazirgi ýaqytta olardyń alty epizodqa qatysy bary anyqtalǵan.
Atalǵan fakti boiynsha tergeý júrgizilip jatyr.
Politsiia internet-alaiaqtardyń áleýmettik jeliler men messendjerler arqyly ózin túrli uiym qyzmetkeri retinde tanystyryp, jalǵan «másele» oilap tabatynyn eskertti. Azamattardy kúmándi habarlamalarǵa senbeýge, jeke derekter men rastaý kodtaryn bermeýge, beitanys adamdarǵa aqsha aýdarmaýǵa shaqyrdy. Kúmán týyndaǵan jaǵdaida quqyq qorǵaý organdaryna júginý qajet.
