شىمكەنت قالاسى پوليسيا دەپارتامەنتىنىڭ كيبەرقىلمىسقا قارسى ءىس-قيمىل باسقارماسى ستۋدەنتتەردى نىساناعا العان الاياقتىق سحەمانىڭ جولىن كەستى، دەپ حابارلايدى Dala news.
تەرگەۋ مالىمەتىنشە، ەكى كۇدىكتى 2025 جىلدىڭ قازان ايىنان باستاپ TikTok الەۋمەتتىك جەلىسى ارقىلى شىمكەنتتىك جوعارى وقۋ ورىندارىنىڭ ستۋدەنتتەرىن انىقتاپ وتىرعان. ارنايى بوتتاردىڭ كومەگىمەن ولار پايدالانۋشىلاردىڭ ۇيالى تەلەفون نومىرلەرى مەن انكەتالىق دەرەكتەرىن العان.
كەيىن كۇدىكتىلەر وقۋ ورنىنىڭ پورتالىن پايدالانىپ، ستۋدەنتتەردىڭ ۇلگەرىمىن تەكسەرگەن. كەيبىرىندە سىناقتان تومەن بالل بارىن انىقتاعان سوڭ، بەلسەندى ارەكەتكە كوشكەن.
الاياقتار مەسسەندجەر ارقىلى جالعان نومىرلەردەن حابارلاسىپ، وزدەرىن ۋنيۆەرسيتەت قىزمەتكەرى رەتىندە تانىستىرعان. ستۋدەنتتەرگە «ءبىر بالل جەتپەي تۇر»، «اكادەميالىق قارىز تۋىندايدى» دەگەن جالعان اقپارات بەرىپ، ماسەلەنى «شەشىپ بەرۋدى» جانە باعانى «تۇزەتۋدى» ۇسىنعان.
قىزمەتى ءۇشىن ءار ستۋدەنتتەن 70–80 مىڭ تەڭگە تالاپ ەتكەن. اقشا العاننان كەيىن بايلانىسقا شىقپاي قويعان. قازىرگى ۋاقىتتا ولاردىڭ التى ەپيزودقا قاتىسى بارى انىقتالعان.
اتالعان فاكتى بويىنشا تەرگەۋ جۇرگىزىلىپ جاتىر.
پوليسيا ينتەرنەت-الاياقتاردىڭ الەۋمەتتىك جەلىلەر مەن مەسسەندجەرلەر ارقىلى ءوزىن ءتۇرلى ۇيىم قىزمەتكەرى رەتىندە تانىستىرىپ، جالعان «ماسەلە» ويلاپ تاباتىنىن ەسكەرتتى. ازاماتتاردى كۇماندى حابارلامالارعا سەنبەۋگە، جەكە دەرەكتەر مەن راستاۋ كودتارىن بەرمەۋگە، بەيتانىس ادامدارعا اقشا اۋدارماۋعا شاقىردى. كۇمان تۋىنداعان جاعدايدا قۇقىق قورعاۋ ورگاندارىنا جۇگىنۋ قاجەت.
