Shymkent qalasynyń ákimi Ǵabit Syzdyqbekovtiń tóraǵalyǵymen Quqyq buzýshylyq profilaktikasy jónindegi vedomstvoaralyq komissiianyń kezekten tys otyrysy ótti. Jiynǵa quqyq qorǵaý jáne arnaýly organdardyń basshylary, máslihat depýtattary, Qoǵamdyq keńes músheleri men buqaralyq aqparat quraldarynyń ókilderi qatysty.
Otyrys barysynda qaladaǵy kriminogendik ahýal, qabyldanyp jatqan aldyn alý sharalarynyń tiimdiligi jáne qoǵamdyq qaýipsizdikti qamtamasyz etýdegi vedomstvoaralyq ózara is-qimyl máseleleri talqylandy. Kún tártibi boiynsha Shymkent qalalyq politsiia departamenti bastyǵynyń mindetin atqarýshy Arman Beisenbaev, Quqyqtyq statistika jáne arnaiy esepke alý jónindegi komitettiń qalalyq departamentiniń basshysy Órken Seiitov jáne qala prokýrorynyń orynbasary Rashid Ámirov baiandama jasady.
Qala ákimi quqyq buzýshylyqtyń aldyn alý memlekettik organdar qyzmetiniń negizgi basymdyqtarynyń biri bolyp qala berýge tiis ekenin atap ótti. Ol jańa «Quqyq buzýshylyq profilaktikasy týraly» zańnyń kúshine enýine bailanysty jergilikti deńgeide aldyn alý sharalaryn kúsheitý, qaýip-qaterlerdi erte kezeńde anyqtaý jáne keshendi tásildi engizýdiń mańyzyn aitty.
«Negizgi nazar quqyq buzýshylyqtardy erte anyqtaýǵa qoiylýy kerek. Profilaktika – tek quqyq qorǵaý organdarynyń ǵana emes, búkil memlekettik apparattyń ortaq mindeti. Bul jumys júieli ári turaqty túrde júrgizilýi tiis», – dedi Ǵabit Syzdyqbekov.
Sonymen qatar megapolis basshysy aýyr quqyq buzýshylyqtardyń, onyń ishinde kámeletke tolmaǵandar arasyndaǵy sýitsid jaǵdailarynyń aldyn alýǵa erekshe kóńil bóldi.
«Ókinishke qarai, Shymkentte mundai qaiǵyly jaǵdailar tirkelip otyr. Olardyń aldyn alý – búkil qoǵamnyń ortaq jaýapkershiligi. Úide – ata-ana, mektepte – muǵalim, kóshede – árbir azamat beijai qalmaýy tiis. Sondyqtan aqparattyq-túsindirý jumystaryn kúsheitý asa mańyzdy», – dedi qala ákimi.
Jiyn qorytyndysynda Ǵabit Syzdyqbekov jaýapty organdarǵa birqatar naqty tapsyrma berip, quqyq qorǵaý organdary men aýdan ákimderine ózara úilesimdi ári júieli jumys isteýdi mindettedi.
