Shymkent qalasynyń Turan aýdandyq politsiia basqarmasynyń burynǵy bastyǵy Nurjan Tileýov para alǵany úshin 6 jylǵa bas bostandyǵynan aiyryldy, dep habarlaidy Dalanews.kz.
Nurjan Tileýovti ótken jyldyń tamyz aiynda Shymkent qalasy boiynsha UQK departamentiniń qyzmetkerler ustaǵan.
Halyqstan málimetinshe, sot protsesiniń bastapqy kezeńinde aiyptalýshynyń advokattary bultartpaý sharasyn úiqamaqqa aýystyrýdy suraǵan. Qorǵaý tarapy Nurjan Tileýovtiń birneshe ai boiy UQK tergeý izoliatorynyń jalǵyz kamerasynda otyrǵanyn, sonyń saldarynan onyń fizikalyq jáne psihoemotsionaldyq jaǵdaiy alańdaýshylyq týdyratynyn alǵa tartqan.
Alaida sot bul ýájderdi qanaǵattandyrýǵa negiz joq dep tanyp, ótinishti keri qaitardy.
Qylmystyq is materialdaryna sáikes, 6 million teńge para burynǵy politsiia basshysyna esirtki satý baby boiynsha qozǵalǵan isti saqtaý babyna qaita saralaý úshin berilgen. Bul óz kezeginde kúdiktiniń jazasyn jeńildetýge múmkindik beretin edi.
Soǵan qaramastan, Nurjan Tileýov óz kinásin moiyndaǵan joq. Ol sot úkimin zańsyz dep atap, al berilgen aqshany provokatsiia dep baǵalady.
Aita ketý kerek, aiyptalýshy 3 million teńgeni aryzdanýshyǵa qaitaryp bergenin de sotta málimdegen.
Sonymen qatar, qazirgi ýaqytta taǵy bir politsiia qyzmetkeri Ál-Farabi aýdandyq politsiia basqarmasynyń basshysy Batyr Myrzaqeldiev te qylmystyq qýdalaýǵa ilikken. Ol 20 million teńge kóleminde para aldy degen kúdikke ilingen.
Bul is boiynsha da qorǵaý tarapy aqshanyń para emes, arnaiy uiymdastyrylǵan arandatý ekenin aityp otyr.
Qazirgi tańda eki is boiynsha da quqyq qorǵaý organdarynyń tergeý jáne sot sheshimderi qoǵam nazarynda.
