شىمكەنت قالاسىنىڭ تۇران اۋداندىق پوليسيا باسقارماسىنىڭ بۇرىنعى باستىعى نۇرجان تىلەۋوۆ پارا العانى ءۇشىن 6 جىلعا باس بوستاندىعىنان ايىرىلدى، دەپ حابارلايدى Dalanews.kz.

نۇرجان تىلەۋوۆتى وتكەن جىلدىڭ تامىز ايىندا شىمكەنت قالاسى بويىنشا ۇقك دەپارتامەنتىنىڭ قىزمەتكەرلەر ۇستاعان. 

Halyqstan مالىمەتىنشە، سوت پروسەسىنىڭ باستاپقى كەزەڭىندە ايىپتالۋشىنىڭ ادۆوكاتتارى بۇلتارتپاۋ شاراسىن ءۇيقاماققا اۋىستىرۋدى سۇراعان. قورعاۋ تاراپى نۇرجان تىلەۋوۆتىڭ بىرنەشە اي بويى ۇقك تەرگەۋ يزولياتورىنىڭ جالعىز كامەراسىندا وتىرعانىن، سونىڭ سالدارىنان ونىڭ فيزيكالىق جانە پسيحوەموسيونالدىق جاعدايى الاڭداۋشىلىق تۋدىراتىنىن العا تارتقان.

الايدا سوت بۇل ۋاجدەردى قاناعاتتاندىرۋعا نەگىز جوق دەپ تانىپ، ءوتىنىشتى كەرى قايتاردى.

قىلمىستىق ءىس ماتەريالدارىنا سايكەس، 6 ميلليون تەڭگە پارا بۇرىنعى پوليسيا باسشىسىنا ەسىرتكى ساتۋ بابى بويىنشا قوزعالعان ءىستى ساقتاۋ بابىنا قايتا سارالاۋ ءۇشىن بەرىلگەن. بۇل ءوز كەزەگىندە كۇدىكتىنىڭ جازاسىن جەڭىلدەتۋگە مۇمكىندىك بەرەتىن ەدى.

سوعان قاراماستان، نۇرجان تىلەۋوۆ ءوز كىناسىن مويىنداعان جوق. ول سوت ۇكىمىن زاڭسىز دەپ اتاپ، ال بەرىلگەن اقشانى پروۆوكاسيا دەپ باعالادى.

ايتا كەتۋ كەرەك، ايىپتالۋشى 3 ميلليون تەڭگەنى ارىزدانۋشىعا قايتارىپ بەرگەنىن دە سوتتا مالىمدەگەن.

سونىمەن قاتار، قازىرگى ۋاقىتتا تاعى ءبىر پوليسيا قىزمەتكەرى ءال-فارابي اۋداندىق پوليسيا باسقارماسىنىڭ باسشىسى باتىر مىرزاقەلدييەۆ تە قىلمىستىق قۋدالاۋعا ىلىككەن. ول 20 ميلليون تەڭگە كولەمىندە پارا الدى دەگەن كۇدىككە ىلىنگەن.

بۇل ءىس بويىنشا دا قورعاۋ تاراپى اقشانىڭ پارا ەمەس، ارنايى ۇيىمداستىرىلعان ارانداتۋ ەكەنىن ايتىپ وتىر.

قازىرگى تاڭدا ەكى ءىس بويىنشا دا قۇقىق قورعاۋ ورگاندارىنىڭ تەرگەۋ جانە سوت شەشىمدەرى قوعام نازارىندا.