Shymkentte zamanaýı úlgide jańa áýejaı qurylysy bastalmaq. Atalǵan joba qoldanystaǵy áýejaıdyń tıimsiz bolýyna baılanysty qolǵa alynyp otyr. Bul týraly Óńirlik komýnıkasıalyq qyzmetinde ótken baspasóz máslıhatynda oblystyq Sáýlet jáne qala qurylysy basqarmasynyń basshysy Erkin Júsipov málim etti. Sondaı-aq, jýyrda shahardaǵy temir jol vokzalynyń zamanaýı kelbetin anyqtap, jolaýshylardyń tehnıkalyq qaýipsizdigin saqtaý maqsatynda jańa eskızdik jobalary ázirlenipti.

– Qazirgi qoldanystaǵy áýejaıdyń Qorǵanys mınıstrliginiń teńgeriminde bolýyna baılanysty jańa áýejaıdyń 3 jańa nobaıyn ázirledik. Alǵashqy nusqa boıynsha áýejaı qazirgi áýejaıdyń ońtústik-batys bóliginde ornalassa, ekinshi nusqada Ordabasy aýdanynyń aýmaǵynda, al úshinshi nusqada Shymkent qalasynyń soltústik jaǵyndaǵy aýmaqta ornalasatyny kórsetilgen, – dedi Erkin Júsipov.

Basqarma basshysynyń aıtýynsha, óńirge týrıserdi kóptep tartý maqsatynda Taraz, Qyzylorda, Tashkent baǵyttarynan oblys aýmaǵyna kireberis qaqpalar men belgilerdiń jańa nobaılary jasalanypty. Sonymen qatar, "Batys Eýropa - Batys Qytaı'' halyqaralyq kólik dáliziniń 8 aýdan aýmaǵynan ótetin bóliginde boı kóteretin 39 qyzmet kórsetý nysanynyń eskızdik nobaıy da ázirlenip, oblystyq qala qurylysy keńesiniń talqylaýyna usynylǵan.

Qazirgi tańda oblysymyzdaǵy turǵyndar sany 5 myń adamǵa deıingi eldi mekenderdi damytý men qurylys salý shemalarymen qamtamasyz etý 55 paıyzdy quraıdy. 2016 jyly 114 eldi mekenniń shemasyn ázirleý josparlansa, búginde onyń 104 daıyndalǵan.

Budan bólek, basqarma oblys ákiminiń tapsyrmasymen 40 qabatty «Shymkent táji» turǵyn úı kesheniniń nobaıyn ázirlep bitirgen. Sonymen qatar, Shymkent qalasynyń bas josparyna sáıkes óndiris jáne bazarlardy, saýda ortalyqtaryn shahar ortalyǵynan qala syrtyna kóshirý nusqalary usynylǵan.

OQO ákiminiń baspasóz qyzmeti

 Foto. Samat Myrzalıev.