شىمكەنتتە زاماناۋي ۇلگىدە جاڭا اۋەجاي قۇرىلىسى باستالماق. اتالعان جوبا قولدانىستاعى اۋەجايدىڭ ءتيىمسىز بولۋىنا بايلانىستى قولعا الىنىپ وتىر. بۇل تۋرالى وڭىرلىك كوممۋنيكاسيالىق قىزمەتىندە وتكەن باسپا ءسوز ءماسليحاتىندا وبلىستىق ساۋلەت جانە قالا قۇرىلىسى باسقارماسىنىڭ باسشىسى ەركىن ءجۇسىپوۆ ءمالىم ەتتى. سونداي-اق، جۋىردا شاھارداعى تەمىر جول ۆوكزالىنىڭ زاماناۋي كەلبەتىن انىقتاپ، جولاۋشىلاردىڭ تەحنيكالىق قاۋىپسىزدىگىن ساقتاۋ ماقساتىندا جاڭا ەسكيزدىك جوبالارى ازىرلەنىپتى.

– قازىرگى قولدانىستاعى اۋەجايدىڭ قورعانىس مينيسترلىگىنىڭ تەڭگەرىمىندە بولۋىنا بايلانىستى جاڭا اۋەجايدىڭ 3 جاڭا نوبايىن ازىرلەدىك. العاشقى نۇسقا بويىنشا اۋەجاي قازىرگى اۋەجايدىڭ وڭتۇستىك-باتىس بولىگىندە ورنالاسسا، ەكىنشى نۇسقادا ورداباسى اۋدانىنىڭ اۋماعىندا، ال ءۇشىنشى نۇسقادا شىمكەنت قالاسىنىڭ سولتۇستىك جاعىنداعى اۋماقتا ورنالاساتىنى كورسەتىلگەن، – دەدى ەركىن ءجۇسىپوۆ.

باسقارما باسشىسىنىڭ ايتۋىنشا، وڭىرگە تۋريستەردى كوپتەپ تارتۋ ماقساتىندا تاراز، قىزىلوردا، تاشكەنت باعىتتارىنان وبلىس اۋماعىنا كىرەبەرىس قاقپالار مەن بەلگىلەردىڭ جاڭا نوبايلارى جاسالانىپتى. سونىمەن قاتار، "باتىس ەۋروپا - باتىس جۇڭگو'' حالىقارالىق كولىك ءدالىزىنىڭ 8 اۋدان اۋماعىنان وتەتىن بولىگىندە بوي كوتەرەتىن 39 قىزمەت كورسەتۋ نىسانىنىڭ ەسكيزدىك نوبايى دا ازىرلەنىپ، وبلىستىق قالا قۇرىلىسى كەڭەسىنىڭ تالقىلاۋىنا ۇسىنىلعان.

قازىرگى تاڭدا وبلىسىمىزداعى تۇرعىندار سانى 5 مىڭ ادامعا دەيىنگى ەلدى مەكەندەردى دامىتۋ مەن قۇرىلىس سالۋ سحەمالارىمەن قامتاماسىز ەتۋ 55 پايىزدى قۇرايدى. 2016 جىلى 114 ەلدى مەكەننىڭ سحەماسىن ازىرلەۋ جوسپارلانسا، بۇگىندە ونىڭ 104 دايىندالعان.

بۇدان بولەك، باسقارما وبلىس اكىمىنىڭ تاپسىرماسىمەن 40 قاباتتى «شىمكەنت ءتاجى» تۇرعىن ءۇي كەشەنىنىڭ نوبايىن ازىرلەپ بىتىرگەن. سونىمەن قاتار، شىمكەنت قالاسىنىڭ باس جوسپارىنا سايكەس ءوندىرىس جانە بازارلاردى، ساۋدا ورتالىقتارىن شاھار ورتالىعىنان قالا سىرتىنا كوشىرۋ نۇسقالارى ۇسىنىلعان.

وقو اكىمىنىڭ باسپا ءسوز قىزمەتى

 فوتو. سامات مىرزالييەۆ.