Shymkentte er adam kámeletke tolmaǵan qyzdy óz erkinen tys alyp qashqan. Bul týraly jábirlenýshi málimdedi, dep habarlaidy Dalanews.kz.
EGov.press telegram arnasy usynǵan málimetke súiensek, Shymkent qalasynyń 17 jastaǵy turǵyny ózine qatysty aýyr qylmys jasalǵanyn málimdegen. Aitýynsha, ózin buryn-sońdy kórmegen er adam birneshe serigimen jol boiynan kúshtep kólikke otyrǵyzyp, belgisiz baǵytqa alyp qashqan.
“Múldem tanymaityn er adam alyp qashty. Keiin onyń maqsatyn túsindim, meni áiel qylyp almaq bolǵan. Artynsha meni Túrkistan oblysy, Saryaǵash aýdanyna alyp barǵanyn bildim. Úige kirgen kezde olardyń týystary men jeńgeleri oramaldaryn ala júgirip, balalary otshashý atyp jatty. Alyp qashý sátin kameraǵa túsirip júrgen adamdar da kóp boldy. Sol kezde bul árekettiń aldyn ala josparlanǵanyn túsindim”, - deidi ol.
Jábirlenýshi ata-anasynyń ol kezde qasynda bolmaǵanyn kúdiktiler bile tura, jaǵdaidy ádeii uiymdastyrǵanyn aitady.
“Men birneshe ret 17 jasta ekenimdi aityp, ata-anama habarlasý keregin talap ettim. Alaida soǵan qaramastan, olar meni kúshtep óz úilerine kirgizdi”, - dep qosty ol.
Keiin kúdiktiler telefonyn tartyp alyp, óz erkimen barǵanyn jáne eshqandai májbúrleý bolmaǵany týraly qolhat jazdyrýǵa tyrysqan.
“Eger qolhat jazbasam, telefonymdy bermeitinderin aitty. Men qolhat jazbaitynymdy aitqannan keiin, olar meni jynystyq qatynasqa májbúrledi”, - deidi jábirlenýshi.
Sonymen qatar kúdiktiler aitqandaryna kónbese, qamap ustaityndaryn aitqan.
“Olar bul áreketterin “qazaqshylyq”, “dástúrimiz osyndai”, “bul úiden qyz bolyp shyqpaýyń kerek” dep aqtaýǵa tyrysty. Sonymen qatar ary qarai oqýǵa barmaitynymdy, bul úiden shyqpaitynymdy aitty”, - deidi ol.
Jábirlenýshiniń sózinshe, májbúrli túrde jynystyq qatynasqa túsirgennen keiin, olar tósek jaimasyn alyp, kelesi bólmede otyrǵan jeńgelerine baryp “súiinshi” surap, ózderinshe toilaǵan.
“Al bolǵan zorlyq-zombylyqtan keiin meniń qandai kúide bolǵanym eshkimdi qyzyqtyrmady, eshkim jaǵdaiyma mán bergen joq”, - deidi ol.
Jábirlenýshi araǵa uzaq ýaqyt salmai kúdiktilerdiń úiinen qashyp ketken. Alaida sodan beri bul is boiynsha eshkim tergelmegen ári jaýapkershilikke tartylmaǵan.
“Qazirgi tańda men anam men baýyrlarymnyń janyndamyn. Maǵan qaýip tónip turǵan joq. Biraq osy bolǵan oqiǵaǵa qatysy bar barlyq adamnyń qatań jazalanǵanyn suraimyn”, - dedi ol.
