Mototsikldi ómiriniń máni dep biletin 100 shaqty baiker kezekti maýsymnyń ashylýyn «EKSPO-2017» halyqaralyq kórmesine arnady. Shymkent qalasynyń kóshelerin aralap, «EKSPO-2017» kórmesin nasihattaǵan avtoshabandozdar ózderine tán erejeler men qaǵidalardy jurt nazaryna usyndy. Sondai-aq Shymkent qalasyndaǵy №3 jetim balalar úiine arnaiy baryp, qaiyrymdylyq sharasyna atsalysty.
Ońtústik Qazastan baikerler federatsiiasynyń prezidenti Rústem Bazarbekovtiń aitýynsha, 29 mamyr kúni ońtústikqazaqstandyq 10 baiker EKSPO-2017 kórmesiniń qurmetine respýblikalyq motosherý uiymdastyrmaq. Shymkent qalasynan bastaý alatyn motosherýdiń maqsaty – EKSPO kórmesin respýblika jurtyna keńinen nasihattaý.
«Motosherý 29 – mamyrda Shymkentten bastaý alady. Bizdiń bul ideiamyzǵa Ońtústik Qazaqstan oblysynyń ákimdigi qoldaý bildirip otyr. Eń aldymen biz rýhani astanamyz - Túrkistan qalasyna sosyn Qyzylorda, Aqtóbe, Qostanai, Petropavl, Kókshetaý qalalary arqyly elorda da ótip jatqan «EKSPO-2017» halyqaralyq kórmesiniń ashylý saltanatyna kirip barǵaly otyrmyz», - deidi Ońtústik Qazastan oblystyq mototsiklister federatsiiasynyń prezidenti Rústem Bazarbekov.
Esterińizge sala keteiik, búginde Ońtústik Qazaqstan oblysynda motosportqa qyzyǵýshylyq tanytyp, baiker atanǵandardyń sany 300-ge jýyqtaidy. Olar jyl saiyn oblysymyzdaǵy qoǵamdyq is-sharalarǵa belsene qatysyp, jastardy sportqa baýlýǵa, salaýatty ómir saltyn ustanýǵa atsalysyp keledi.
OQO ákiminiń baspasóz qyzmeti
