Energetika ministri Qanat Bozymbaevtyń Shymkenttegi munai óńdeý zaýytyna jasaǵan sapary barysynda qaita jańǵyrtýdan ótip jatqan óndiris ornynyń ahýaly týraly májilis ótti. Oǵan ministrmen qatar OQO ákimi, zaýyt basshylyǵy men jańǵyrtý jumystaryn júrgizýshi «SRESS» merdiger kompaniiasynyń vitse-prezidenti jáne taǵy da basqa sala mamandary qatysty.
Májilis barysynda merdiger kompaniia ókili Mý Hýadýn jańǵyrtý jumystaryna 4 myń jumysshy tartylǵanyn málim etti. Bir qyzyǵy, onyń 3 myńy qytailyq azamattar bolsa, 1 myńy ǵana qazaqstandyqtar eken.
Muny estigen Ońtústik Qazaqstan oblysynyń ákimi bul talapqa sai emestigin aityp, basshylyqqa jergilikti azamattardy jumysqa tartý qajettigin eskertti.
«Shymkenttegi munai óńdeý zaýyty eń iri salyq tóleýshi óndiris ornynyń birine ainalyp otyr. Munda jergilikti jumysshylardyń úlesi kóbirek bolýy qajet. Ol úshin oblys ortalyǵyndaǵy kásiptik tehnikalyq mamandandyrylǵan kolledjdi óz qamqorlyqtaryńyzǵa alyp, jumys jasaǵandaryńyz durys»,-dedi Túimebaev myrza.
Aita keterligi, Shymkent munai óńdeý zaýytyndaǵy jańǵyrtý jumystary keler jyly aiaqtalady. Energetika ministriniń sózine sensek, keler jyldan bastap elimizde benzin tapshylyǵy bolmaidy. Sebebi Shymkenttegi zaýytty qosqanda Atyraý men Pavlodardaǵy óndiris oryndary jańǵyrtý jumystarynan ótken soń janar-jaǵarmai men dizel otyn kóptep shyǵarylyp, eksporttaýǵa da múmkindik týmaq.
Derekkóz: nur.kz
