Shymkentte sot er adamdy buǵy múıizderin zańsyz saqtaǵany úshin kináli dep tanydy. Tabıǵatqa keltirilgen zalal shamamen 3 mlrd teńgege baǵalandy. Aıyptalýshy bas bostandyǵynan aıyrylyp, sot shyǵyndaryn óteýge mindetteldi, dep habarlaıdy Dalanews.kz.
Hronika.kz dereginshe, 1982 jyly týǵan azamat QR Qylmystyq kodeksiniń 339-1-baby 4-bóligi («Sırek kezdesetin janýarlardyń bólikterimen nemese olardyń derıvattarymen asa iri mólsherde zańsyz aınalysý») boıynsha kináli dep tanylǵan. Tergeý nusqasyna sáıkes, ol belgisiz tulǵamen birigip, buǵy múıizderin satyp alý jáne saqtaý úshin top qurǵan.
Tergeý málimetinshe, 2025 jylǵy 15 sáýirde aıyptalýshy 12 qapqa salynǵan 1 977 buǵy múıizin satyp alyp, óz úıiniń aýmaǵynda saqtaǵan. 2 shilde kúni polısıa bul qoımalardy anyqtap, er adamǵa qatysty qylmystyq is qozǵaǵan.
Aıyptalýshy sotta múıizderdi oǵan uzaq ýaqyt boıy dostary men tanystary ákelip bergenin, olardy qylmystyq nıetsiz saqtaǵanyn aıtqan. Keıin beıtanys adamdar múıizderdi satyp alýdy usynǵanyn, sol kelisimnen keıin polısıa aralasqanyn málimdedi.
Túrkistan oblystyq orman sharýashylyǵy men janýarlar dúnıesin qorǵaý aýmaqtyq ınspeksıasynyń jabaıy tabıǵatty jáne ańshylyqty qorǵaý bóliminiń bas mamany tárkilengen múıizderdiń Qyzyl kitapqa engen janýarlardyń týyndylaryna jatatynyn habarlady. Tabıǵatqa keltirilgen zalal 2 915 086 500 teńge dep eseptelgen.
Qazaqstanda tabıǵı ortada zańsyz aýlanǵan jabaıy janýarlar úshin ótemaqy mólsheri Aýyl sharýashylyǵy mınıstriniń buıryǵymen belgilengen: bir buǵy úshin 500 aılyq eseptik kórsetkish.
Sot aıyptalýshydan jábirlenýshilerge ótemaqy qory úshin 78 640 teńge jáne sot saraptamalaryna ketken shyǵyn retinde 53 799 teńge óndirý týraly sheshim shyǵardy. Al 3 mlrd teńgege jýyq ekologıalyq zalaldy óteý jónindegi talap qaralmady, orman sharýashylyǵy organdaryna bul talapty azamattyq tártippen qoıý usynyldy.
Shymkent qalasynyń aýdanaralyq qylmystyq soty er adamdy kináli dep tanyp, ony eń tómengi qaýipsizdik rejımindegi mekemede 3 jyl 6 aı merzimge bas bostandyǵynan aıyrdy. Úkim ázirge zańdy kúshine engen joq.
Resmı derekterge sáıkes, Qazaqstandaǵy toǵaı buǵylarynyń jalpy sany 1,5–2 myń bastan aspaıdy.
