Shymkentte ózin memlekettik baǵdarlamalar arqyly qaitarymsyz grant áperemin dep sendirgen 31 jastaǵy áielge sot úkimi shyqty. Ol úsh adamnan jalpy kólemi 8,6 million teńge alyp, alaiaqtyq jasaǵany úshin 3 jyl 6 aiǵa bas bostandyǵynan aiyryldy, dep habarlaidy Dalanews.kz.
Otyrar.kz málimetinshe, aiyptalýshy jábirlenýshilerge ózin halyqqa qyzmet kórsetý ortalyǵynyń jumyspen qamtý bóliminde isteitin qyzmetker retinde tanystyryp, senimine kirgen. Ol "Atameken" baǵdarlamasy boiynsha 5 million jáne 1 million 50 myń teńge kóleminde grant alyp bere alatynyn aityp, ýáde bergen. Nátijesinde jábirlenýshiler men olardyń týystary jalpy somasy 32 million teńge grantqa qol jetkizemiz dep oilap, qarajattaryn bergen.
Sottalýshy kinásin ishinara moiyndaǵan. Úkimde ol QR Qylmystyq kodeksiniń 190-baby 3-bóliginiń 1) jáne 3) tarmaqtary boiynsha kináli dep tanylǵany jazylǵan.
Konstitýtsiianyń 30 jyldyǵyna bailanysty jariialanǵan raqymshylyqqa sáikes jaza merzimi qysqartylyp, túpkilikti sheshim boiynsha ol 2 jyl 4 aiǵa bas bostandyǵynan aiyryldy. Áiel jazasyn qaýipsizdigi ortasha túzeý mekemesinde óteidi. Alaida onyń kámelet jasqa tolmaǵan balalarynyń bolýyna bailanysty sot jazany óteýdi eki jylǵa shegerdi.
Sonymen birge sottalýshy jábirlenýshilerge keltirgen shyǵyndy óteýge mindetteldi:
- Mámetóreniń paidasyna — 2,7 mln teńge;
- Ádilbekovanyń paidasyna — 2,8 mln teńge;
- Paiazovanyń paidasyna — 3,1 mln teńge;
- memleket paidasyna — 86 myń teńge memlekettik baj salyǵy.
Úkim 15 qyrkúiekte shyqqanymen, áli zańdy kúshine engen joq.
