شىمكەنتتە ءوزىن مەملەكەتتىك باعدارلامالار ارقىلى قايتارىمسىز گرانت اپەرەمىن دەپ سەندىرگەن 31 جاستاعى ايەلگە سوت ۇكىمى شىقتى. ول ءۇش ادامنان جالپى كولەمى 8،6 ميلليون تەڭگە الىپ، الاياقتىق جاساعانى ءۇشىن 3 جىل 6 ايعا باس بوستاندىعىنان ايىرىلدى، دەپ حابارلايدى Dalanews.kz.
Otyrar.kz مالىمەتىنشە، ايىپتالۋشى جابىرلەنۋشىلەرگە ءوزىن حالىققا قىزمەت كورسەتۋ ورتالىعىنىڭ جۇمىسپەن قامتۋ بولىمىندە ىستەيتىن قىزمەتكەر رەتىندە تانىستىرىپ، سەنىمىنە كىرگەن. ول "اتامەكەن" باعدارلاماسى بويىنشا 5 ميلليون جانە 1 ميلليون 50 مىڭ تەڭگە كولەمىندە گرانت الىپ بەرە الاتىنىن ايتىپ، ۋادە بەرگەن. ناتيجەسىندە جابىرلەنۋشىلەر مەن ولاردىڭ تۋىستارى جالپى سوماسى 32 ميلليون تەڭگە گرانتقا قول جەتكىزەمىز دەپ ويلاپ، قاراجاتتارىن بەرگەن.
سوتتالۋشى كىناسىن ءىشىنارا مويىنداعان. ۇكىمدە ول ق ر قىلمىستىق كودەكسىنىڭ 190-بابى 3-بولىگىنىڭ 1) جانە 3) تارماقتارى بويىنشا كىنالى دەپ تانىلعانى جازىلعان.
كونستيتۋسيانىڭ 30 جىلدىعىنا بايلانىستى جاريالانعان راقىمشىلىققا سايكەس جازا مەرزىمى قىسقارتىلىپ، تۇپكىلىكتى شەشىم بويىنشا ول 2 جىل 4 ايعا باس بوستاندىعىنان ايىرىلدى. ايەل جازاسىن قاۋىپسىزدىگى ورتاشا تۇزەۋ مەكەمەسىندە وتەيدى. الايدا ونىڭ كامەلەت جاسقا تولماعان بالالارىنىڭ بولۋىنا بايلانىستى سوت جازانى وتەۋدى ەكى جىلعا شەگەردى.
سونىمەن بىرگە سوتتالۋشى جابىرلەنۋشىلەرگە كەلتىرگەن شىعىندى وتەۋگە مىندەتتەلدى:
- مامەتورەنىڭ پايداسىنا — 2،7 ملن تەڭگە؛
- ادىلبەكوۆانىڭ پايداسىنا — 2،8 ملن تەڭگە؛
- پايازوۆانىڭ پايداسىنا — 3،1 ملن تەڭگە؛
- مەملەكەت پايداسىنا — 86 مىڭ تەڭگە مەملەكەتتىك باج سالىعى.
ۇكىم 15 قىركۇيەكتە شىققانىمەن، ءالى زاڭدى كۇشىنە ەنگەن جوق.
