Shymkent-Astana reisi boiynsha ushaq qonar kezde quspen soqtyǵysqan - dep habarlaidy Dalanews.kz.
1 mamyrda Shymkent - Astana baǵyty boiynsha jolaýshylar ushaǵy qoný kezinde quspen soqtyǵysqan. Bul jait reistiń sońǵy kezeńinde, ushaq Astana halyqaralyq áýejaiyna qonǵaly jatqan sátte bolǵan.
SCAT áýekompaniiasynyń baspasóz qyzmeti málimetinshe, qustyń ushaqqa soǵylýy saldarynan áýe kemesiniń bir bólshegi zaqymdanǵan. Jedel tehnikalyq tekseris júrgizilip, zaqymdanǵan bólshekti aýystyrý qajet bolǵan.
"Shymkent - Astana reisi qonar kezde quspen soqtyǵysty. Zaqymdanǵan bólshek aýystyrylýyna bailanysty Astana - Shymkent baǵytynyń jolaýshylary qonaqúige ornalastyrylyp, olarǵa áýejai terminalynda tamaq berildi", – dep túsindirdi kompaniianyń baspasóz qyzmeti ókili.
Kompaniia jolaýshylardyń qaýipsizdigi basty orynda ekenin málimdedi. Sonymen qatar, áýekompaniia mundai tosyn jaǵdailarǵa bailanysty reisterdiń ózgerýine túsinistikpen qaraýǵa shaqyrdy.
Jolaýshylar men ekipaj músheleri arasynda zardap shekkender joq. Ushaq shtattyq rejimde qonǵan, barlyq jolaýshy keri reis keshigetininen der kezinde habardar etilgen.
